Ձեր վստահելի աղբյուրը

Խորհրդարանում այսօր կառավարության հետ հարցուպատասխանի ժամանակ «Ելք» խմբակցության պատգամավոր Արարատ Միրզոյանը ՀՀ վարչապետ Կարեն Կարապետյանից հետաքրքրվեց, թե ո՞ր հարցում է պետք շտկում անել, որոշակի նահանջ անել, որ թանկացումներն այդպես սուր չչոքեն քաղաքացիների բկին։

«Ես այդ հարցին պատասխանել եմ, հարազատներս, հարգելիներս, հարգելի գործընկերներ, 2,6 տոկոս գնաճ, որ դուք ասում եք չոքել է մեր դռանը, ո՞ր գինն է չոքել մեր դռանը։ Մենք կիրառել ենք այն օրենքը, որն ընդունվել է 2016 թվականի հոկտեմբերին, այդ օրենքի մեջ գրված էր այն, ինչ որ պետք է լիներ, և սեպտեմբերին շատ մեծ ունակություն պետք չէր ունենալ՝ դա կանխատեսելու համար։  Պարզ է չէ, որ հարկային բեռն ավելացնելը հաճելի բան չի, բայց մենք ունենք պատրավորություններ արտաքին վարկերի, ունենք տնտեսությունը զարգացնելու խնդիր, ունենք լրացուցիչ միջոցների անհրաժեշտություն։ Մենք քննարկել ենք այն տարբերակները, որոնք մինիմալ բեռ են ստեղծում մեր քաղաքացու բիզնեսի համար, եթե այստեղ չանեինք, մեկ այլ տեղ պիտի անեինք, որպեսզի այն մուտքերն ունենայինք, որն այսօր թույլ է տալիս այսօր մեզ սպասարկել մեր պարտավորությունները»,- պատասխանեց վարչապետը։

Վարչապետի խոսքով՝ բեռն ավելանում է երեք ուղղությամբ. «Ավելանում է գյուղացում մոտ, իսկ դրա լուծումը տալու ենք։ Գազը վերականգնել է այն գինը, որին որ մենք սովոր ենք եղել, և տրանսպորտային ընկերությունները և բոլոր մնացածն աշխատել են այդ սականգներով, սա նորություն չի եղել։ Իսկ բենզինն ունի ալտերնատիվ հնարավորթյուն, չի ուզում բենզին օգտագործի, թող գազ օգտագործի»։

Պատգամավորն արձագանքեց. «Թանկացել է միսը, կարագը, կարտոֆիլը, որ մեզ խորհուրդ էին տալիս ուտել, վառելիքը,  և ակնհայտորեն վառելիքը շղթայական նոր ապրանքների թանկացման է բերելու։ Դուք ասում եք սուբսիդավորել, հետաքրքիր է՝ այդ որտեղի՞ց պետք է անել։ Բայց մարդկանց ո՞նց ասենք, որ պետք է ուտեն ավելի քիչ կարագ, ճաշի մեջ յուղ չգցեն և այլն»։
Վարչապետի խոսքով՝ այն ինչ որ շուկայում է կատարվում, դա շուկայի արձագանքն է։

«Կարագի հետ ինչ-որ կատարվում է, մնացած տեղերում կատարվում է, ո՞նց են դրա դեմ պայքարում, տնտեսական աճ ապահովելով, որպեսզի վաղը մյուս օրը կարողանան կոմպենսացնեն։ Սա է բանաձևը։ Պետությունը գին կարգավորելու իրավունք չունի, այլ խնդիր է, որ ինքը պետք է արձագանքի։ Հիմա կարագն ամբողջ աշխարհում թանկացել է, Հայաստանը այդ կարագի թանկացման դեմ ի՞նչ պետք է անի»։