Պրոբացիոն ծառայության նպատակը անձի վերասոցիալականացումն է. Սուրեն Քրմոյան

Իրավունք 12:30 18/01/2018 Հայաստան

Պրոբացիոն ծառայության նպատակը անձի վերասոցիալականացումն է. Սուրեն Քրմոյան

Պրոբացիայի ծառայության ներդրման վերջնական նպատակը շահառուների շրջանում կրկնահանցագործության ռիսկի նվազեցումն է: Հունվարի 18-ին Երևանում «Պրոբացիայի ծառայության առաջին տարվա գործունեության արդյունքները, խնդիրները և հեռանկարները» թեմայով քննարկմանը այս մասին նշեց ՀՀ արդարադատության նախարարի տեղակալ Սուրեն Քրմոյանը:

«Մեկուկես տարի առաջ մենք առաջին անգամ փորձարկեցինք պրոբացիայի ծառայությունը: Այս ծառայության փորձարկմամբ ՀՀ կառավարությունն ամրագրեց և հաստատեց վերականգնողական արդարադատության համակարգերի ներդրումը, սա նշանակում է, որ պատժի նպատակներին մենք ակնկալում ենք հասնել ոչ միայն անձին ազատազրկման մեջ պահելով, այլև նրան վերասոցիալականացնելով ու պատիժն իրականացնելով՝ առանց ազատությունից զրկելու»,- ասաց նա՝ նշելով, որ շատ կարևոր ու սկզբունքային փոփոխություն է կատարվել:

Քրմոյանի խոսքով՝ անձի պատժի իրականացման հիմնական նպատակ է դիտարկում անձի վերասոցիալականացումը, իսկ սա նշանակում է, որ զուգահեռ կամ որպես հիմնական նպատակ փորձել են վերհանել այն բոլոր ռիսկերն ու պահանջները, որ ունի անձը, ինչպես նաև բոլոր ռիսկերն ու նախապայմանները, որոնք նպաստել են հանցագործություն կատարելու համար: Այս ամենի արդյունքում, ըստ Քրմոյանի, պետք է փորձել ճիշտ թիրախավորված աշխատանք կատարել անհատապես՝ յուրաքանչյուր անձի հետ:

«Փորձելու ենք պայմանական վաղաժակմետ ազատման ինստիտուտը դարձնել ավելի պրոֆեսիոնալ: Հուսով եմ, որ մենք կհասնենք նրան, որ շահառուների շրջանում կրկնահանցագործության ռիսկը էապես կնվազի»,- ասաց նա:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: