Ձեր վստահելի աղբյուրը

«Աջ ղեկ» նախաձեռնությունը մեծացնում է պայքարի դաշտը՝ միանալով թանկացումների դեմ «Ելք» դաշինքի նախաձեռնած երթին: Panorama.am-ի հետ զրույցում «Աջ ղեկ» նախաձեռնության համակարգող Գևորգ Աճեմյանը համոզմունք հայտնեց, որ այս կերպ պայքարն արդյունավետ է ու թիրախային:

«Մենք արդեն հայտարարել ենք, որ պայքարի ճակատը ավելի մեծացնում ենք, և խնդիրը ոչ միայն աջ ղեկով մեքենաների համար պայքարն է լինելու, այլև ընդդեմ թանկացումների: Մենք միանում ենք «Ելք» դաշինքի կազմակերպած ցույց-երթին, սատարելու ենք այդ երթը, իսկ մեր կողմնակիցներին, աջակցողներին հրավիրում ենք վաղը՝ մասնակցելու այդ երթին: Այդ թանկացումներով նույնպես պայմանավորված է լինելու մեքենաների թանկացումը, այսինքն՝ մեքենաների գներն ինքնաբերաբար թանկանալու են»,- ասաց նա:

Աճեմյանի խոսքով՝ Կառավարությունը արհեստականորեն թանկացնում է առկա ապրանքը: Հարցին՝ մտավախություն չունե՞ն, որ պայքարի դաշտն ընդլայնելը կվնասի իրենց պայքարին, նա պատասխանեց, որ խնդիրը արդեն ոչ միայն աջ ղեկն է: Ըստ Աճեմյանի՝ սկզբունքորեն «Աջ ղեկ» նախաձեռնությունը կարող է ասել՝ իր պայքարը հաջողությամբ է ավարտել, քանի որ որպես այդպիսին իրենք պայքարում էին հիմնականում վերահաշվառման արգելքի, իսկ արդեն հետագայում՝ նաև ներմուծման արգելքի դեմ, բայց այդ արգելքով իրենք պայքարում են ինչ-որ խմբի համար:

Հիմա պայքարի ճակատը մեծացնում են՝ պայքարելով ոչ թե միայն որոշ թվով քաղաքացիների, այլ բոլոր քաղաքացիների համար, քանի որ բոլորն են տուժելու այս թանկացումներից, այդ թվում՝ աջ ղեկով մեքենաների վարորդները, ովքեր սպառող են՝ էլեկտրաէներգիայի, դիզվառելիքի կամ առհասարակ տրանսպորտային միջոցների և այսպես շարունակ:

Աճեմյանը նշեց, որ ներմուծողներից շատերն են մասնակցելու երթին, թեպետ անհատաբար չեն զրուցել, չգիտեն՝ ինչպես է տրամադրվածությունը, բայց դատելով ֆեյսբուքյան արձագանքներից՝ բավական շատ են լինելու մասնակցողները: Նա հայտնեց, որ իրենց հետագա քայլերի առումով շատ բան կախված է լինելու վաղվա երթից:

«Մենք մինչև վերջ նրանց հետ ենք լինելու: Ինչ վերաբերում է նստացույցին, հետագա պայքարին, մենք այդ պայքարից անմասն չենք մնալու, նստացույցներին էլ ենք մասնակցելու, եթե բողոք-ավտոերթ լինի՝ դարձյալ մասնակցելու ենք»,- ասաց նա:

Հիշեցնենք, որ Կառավարությունը հունվարի 18-ի նիստում հավանություն տվեց «Աջակողմյան ղեկային տեղաբաշխմամբ տրանսպորտային միջոցների ներմուծումը ժամանակավոր արգելելու մասին» Հայաստանի Հանրապետության օրենքի նախագծին:

Բարձրացված խնդրին ամբողջական լուծում տալու համար Կառավարություն է ներկայացվել նախագիծ, որով առաջարկվում է ժամանակավորապես՝ 2018 թվականի ապրիլի 1-ից մինչև հոկտեմբերի 1-ը արգելել աջակողմյան ղեկային տեղաբաշխմամբ տրանսպորտային միջոցների ներմուծումը ՀՀ տարածք: