Պատրաստվում է Դդմաշենի տարածքում 10 մեգավատ հզորությամբ արևային կայանի կառուցման ծրագիր
Էներգետիկայի, ջրային տնտեսության և հանքարդյունաբերության ոլորտներում Հայաստանի և Ֆրանսիայի միջև համագործակցության ընդլայնման հնարավորություններն են քննարկել ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը և ՀՀ-ում Ֆրանսիայի արտակարգ և լիազոր դեսպան ժոնաթան Լաքոտն՝ այսօր հանդիպման ընթացքում։
Նախարարության տեղեկատվության և հասարակայնության հետ կապերի բաժնի հաղորդմամբ՝ Խոսելով հայ-ֆրանսիական տնտեսական փոգործակցության մասին՝ Աշոտ Մանուկյանն անդրադարձել է մի շարք համատեղ ծրագրերի իրականացմանը։ Կարևորվել է Ֆրանսիայի կառավարության օժանդակությունը Վեդու ջրամբարի կառուցման գործում։
Ընդգծվել է «Վեոլիա ջուր» ընկերության դերը Հայաստանի ջրային տնտեսության կառավարման ոլորտում նոր որակ և մշակույթ ներմուծելու առումով։ Հաշվի առնելով ընկերության մեծ փորձը՝ քննարկվում են «Վեոլիա ջրի» հետ համագործակցության հնարավորությունները նաև էներգետիկայի ոլորտում։ Խոսքը վերաբերում է, մասնավորապես, Կոտայքի տարածաշրջանում աղբի վերամշակումից էլեկտրաէներգիայի արտադրության ծրագրի իրականացմանը։
Անդրադառնալով ատոմային էներգետիկային՝ Աշոտ Մանուկյանը կարևորել է գործակցությունը հատկապես աշխատած միջուկային թափոների կառավարման ոլորտում։ Նախարարը համոզմունք է հայտնել, որ համագործակցությունը կշարունակվի նաև առաջիկայում։
ժոնաթան Լաքոտը նշել է, որ հայ-ֆրանսիական տնտեսական հարաբերություններում առաջնահերթ են էներգտիկային առնչվող հարցերը։ Մի շարք ֆրանսիական ընկերություններ արդեն աշխատում են այս ոլորտում։ Դեսպանի կարծիքով, հետաքրքրություններն անհամեմատ կակտիվանան մասնավոր-պետական հատված համագործակցության վերաբերյալ օրենքի ընդունումից հետո, որին սպասում են բազմաթիվ ընկերություններ։
Տեղեկացնելով, որ օրենքի նախագիծն արդեն պատրաստ է, նախարարը հորդորել է չսպասել վերջինիս ընդունմանը։
«Կառավարությունն ընդունել է այդ օրինագծից բխող հայեցակարգ, որն էլ հաջողությամբ գործում է։ Դրա շրջանակներում իրականացվող առաջին խոշոր նախագիծը «Շնող ՀԷԿ»-ի ծրագիրն է, որին մասնակցում է ամերիկյան «Ռոբինս» ընկերությունը»,-նշել է Աշոտ Մանուկյանը։
Երկրորդ խոշոր ծրագրի իրականացմանն ակնկալվում է ֆրանսիական «Շնեյդեր էլեկտրիկ» ընկերության մասնակցությունը։ Պետություն-մասնավոր համագործակցության շրջանակում պատրաստվում է Դդմաշենի տարածքում 10 մեգավատ հզորությամբ արևային կայանի և կուտակիչի կառուցման առաջնեկային ծրագիր։ Նախարարը տեղեկացրել է, որ այդ նպատակով սկսվել են շփումները կուտակիչներ արտադրող LG և TESLA ընկերությունների հետ։ Ծրագրի իրականացմանը մասնակցելու հարցերը առաջիկայում կքննարկվեն նաև «Շնեյդեր էլեկտրիկ» ընկերության հետ։
Հարակից հրապարակումներ`
- Էներգետիկների միջազգային օրը բացվել է Տավուշի մարզի ամենամեծ արևային էլեկտրական կայանը
- «Շնող» ՀԷԿ-ի կառուցման ծրագիրը կարևոր քայլ է էներգետիկ անվտանգության ապահովման ուղղությամբ. Աշոտ Մանուկյան
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
