Ձեր վստահելի աղբյուրը

Հուսահատության մասին խոսելն ավելի հուսահատեցնում է: Ընդդեմ թանկացումների «Ելք» դաշինքի հրավիրած երթ-ակցիայի մասնակիցներին դիմելով՝ ասաց դաշինքի անդամ Արամ Սարգսյանը՝ նշելով, որ երթի մասնակիցների քանակն իրեն լիովին բավարարում է:

«Այստեղ հավաքվել են մարդիկ, ովքեր քաղաքական են, ովքեր հետևում են գործընթացներին, ովքեր առաջին սպառման ապրանքներ են գնում, բայց վաղը-մյուս օրը հավաքվելու են մարդիկ, ովքեր աշխատում են, ովքեր տրանսպորտի թանկացումից տեսնելու են, որ ոչ միայն չեն կարողանում օրհասական խնդիրները լուծել, այլև վարկեր վերցնել, դիզվառելիքի այդ գներով հող մշակել չկարողացող գյուղացիներն են հավաքվելու»,- ասաց նա:

Սարգսյանը նշեց՝ այս տարին ամբողջությամբ թանկացումների տարի է, և իրենք պուլսը պահելու են թանկացումների, ժողովրդի սրտի բաբախելու ու արյան շրջանառության վրա:

«Ելք» դաշինքի ղեկավար Նիկոլ Փաշինյանը նշեց, որ իրենց պայքարի նպատակն է վերջ տալ ՀՀ քաղաքացիների թշվառացման պրոցեսին:

«Մեզ քննադատում են, ասում են՝ թանկացումների դեմ եք պայքարում՝ փոխանակ քաղաքական պահանջներ առաջադրելու, բայց մի՞թե թանկացումներն ընդամենը սոցիալական խնդիր են պարունակում: Այս ամենը նշանակում է ավելի աղքատացում, իսկ դա նշանակում է, որ ՀՀ քաղաքացիներն ավելի ամուր են գամվելու 10 000 դրամանոց շղթաներով»,- ասաց նա:

Փաշինյանը նշեց, որ իրենք խնդիր են դրել իրենց պայքարին միացող քաղաքացիների օգնությամբ լուծել կոնկրետ խնդիր՝ հարկային օրենսդրության փոփոխությունների մասով, այն է՝ վերադարձնել 2018 թ. հունվարի 1-ին նախորդած մակարդակի: «Մեծ հաշվով մեր քաղաքական խնդիրը, որ ձևակերպում ենք և փորձում ենք կազմակերպել, այն է՝ մենք ուզում ենք ՀՀ քաղաքացիներին դարձնել ՀՀ տնտեսական, քաղաքական կյանքի վճռական գործոն և պատրաստ ենք նրանց առաջնորդել դեպի հաղթանակներ»,- ասաց նա:

Դաշինքի ղեկավարն ասաց, որ ժողովրդից իրենք ակնկալում են մի բան՝ նրանք կբռնեն այդ ձեռքը, որն իրենք պարզել են նրանց: Նա ընդգծեց՝ երթի արդյունքում հարկային փոփոխությունների իրենց պահանջը պիտի ձևակերպեն որպես հանրային պահանջ և դրանով լիազորված՝ կարողանան խորհրդարանական մեծամասնությանը ստիպել՝ ընդունել այն:

Դաշինքի առաջնորդների ելույթներից հետո ակցիայի մասնակիցները «Ի-ջե-ցում» վանկարկումով սկսեցին իրենց երթը: Նրանց երթուղին է՝ Շառլ Ազնավուրի անվան հրապարակ-Աբովյան փողոց-Հանրապետության հրապարակ-Ամիրյան փողոց-Մաշտոցի պողոտա-Սայաթ-Նովա պողոտա-Տերյան փողոց-Թումանյան փողոց-Հյուսիսային: Նիկոլ Փաշինյանը նշեց, որ առջևում անսարք ջորի մակնիշի մեքենա կլինի, երթի մասնակիցները կհրեն այդ կանաչ ջորին, որը խորհրդանշում է այսօրվա տնտեսությունը: