«Կյանք ու կռիվ»-ի հաջողության գաղտնիքը անկեղծ կատարած աշխատանքն է. Սամվել Թադևոսյան

Մշակույթ 14:56 19/01/2018 Հայաստան

Մարդկային արժեքների, ընկերության, սիրո և հայրենասիրության մասին պատմող «Կյանք ու կռիվ» երկմասանոց ֆիլմն այսօր ՀՀ նախագահ Սերժ Սարգսյանի կողմից պետական մրցանակի արժանացավ։

«Ֆիլմի հաջողության գաղտնիքն առաջին հերթին անկեղծ կատարած աշխատանքն է ու պրոֆեսիոնալ մոտեցումը»,- պարգևատրումից հետո լրագրողների հետ զրույցում ասաց ֆիլմի գլխավոր դերակատար, Տրգրանին կերտած Սամվել Թադևոսյանը։

Դերասանի խոսքով՝ ֆիլմի հաջողության համար շատ մեծ նշանակություն ունի նաև ֆինանսական ներդրումը։

«Ստացվել է այն, ինչ ստացվել է, ամեն դեպքում բոլորս շատ պարզ գիտակցում ենք, որ սա շեդեվր չէ»,- ասաց Սամվել Թադևոսյանը։

Լրագրողների դիտարկմանը՝ թե այդպես ասելով դերասանը համեստություն է անում, նա պատասխանեց. «Ոչ, իմ կարծիքն է», այնուհետև հավելեց. «Կինոյի դաշտում բացթողումներ կան, դիլետանտիզմ, ոչ պրոֆեսիոնալ և ոչ լուրջ մոտեցում»։

Հարցին՝ թե ինչու հանդիսատեսն այդքան սիրեց իրեն, Սամվել Թադևոսյանը պատասխանեց. «Երևի գեղեցիկ եմ, հետաքրքիր եմ, երևի այսպիսի դեմքերի պակաս կա։ Ամեն դեպքում անկեղծ եմ»։

Ինչ վերաբերում է կերտած կերպարին ու նրա հետ նմանություններին, ֆիլմի գլխավոր դերակատարը պատասխանեց. «Կերպարիս նման չեմ , ֆիլմից հետո կերպարի մեջ չեմ մնում, այն գնացել է դեպի ենթագիտակցություն։ Առջևում ավելի հետաքրքիր աշխատանքներ կան, թե թատրոնում, թե կինոյում»։

Նշենք, որ Հանրապետության նախագահը պարգևատրեց «Կյանք ու կռիվ» ֆիլմի սցենարի հեղինակ, ռեժիսոր Մհեր Մկրտչյանին, գլխավոր պրոդյուսերներ՝ Ռուբեն Ջաղինյանին, պրոդյուսեր` Կարեն Ղազարյանին, գլխավոր դերակատար Սամվել Թադևոսյանին։

Ֆիլմը նվիրված է Արցախի հերոսներին և ՀՀ անկախության 25-ամյակին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: