Ձեր վստահելի աղբյուրը

Բուրյատիայում կացինով զինված անչափահասը հարձակվել է 7-րդ դասարանի աշակերտների, ռուսաց լեզվի և  գրականության ուսուցչուհու վրա: Ռուսական լրատվամիջոցների փոխանցմամբ, տուժել է 5 մարդ: Զինված հարձակումից հետո չարագործը այրել է դյուրավառ հեղուկով լի շիշը: Հրդեհը տարածվել է մոտ 15 քմ մակերեսով:

Դպրոցում այս պահին անվտանգության ուժեղացված միջոցառումներ են իրականացվում, Բուրյատիայի ղեկավարը հետաձգել է Մոնղոլիա նախատեսած այցը:

«Տուժածներից չորսը երեխաներ են, մեկը՝ 44-ամյա կին: Երեխաներից երեքը ծանր վիճակում են, մյուս երկու վիրավորի վիճակը գնահատվում է միջին ծանրության: Առաջին բուժօգնությունը ստացել են մոտակա զինվորական հոսպիտալում, ինչից հետո տեղափոխվել են Ուլան Ուդե»,-հայտարարել է Բուրյատիայի առողջապահության նախարարը:

Տուժած երեխաները 13 տարեկան են, նրանք բոլորն էլ նույն դասարանից են: Նրանք վնասվածքներ են ստացել կացինի հարվածներից:

«Տղաներից մեկը վնասվածքներ ունի գլխի, մեջքի ու վերջույթների շրջանում»,-ասել է նա:

Ավելի ուշ ռուսական լրատվամիջոցները հայտնեցին, որ տուժածները ոչ թե հինգն են, այլ յոթը, որից վեցը երեխաներ են:

«Լայֆ. Ռու»-ի  փոխանցմամբ, նախնական տվյալներով հարձակվողը նույն դպրոցի աշակերտ է, ով այդ քայլին գնացել է ռուսերենից ստացած ցածր գնահատականի հետևանքով:

Հիշեցնենք, որ ընթացիկ շաբաթվա մեջ սա դպրոցի վրա զինված հարձակման երկրորդ դեպքն է: Նախորդը Պերմի դպրոցներից մեկում էր, որի հետևանքով տուժել էր 15 մարդ, նրանց թվում նաև հայուհի կա: