Ձեր վստահելի աղբյուրը

ՀՀԿ խմբակցության ղեկավար Վահրամ Բաղդասարյանի համար զարամանալի է, որ «Ելք»-ը պատրաստվում է ՀՀ նախագահի թեկնածու Արմեն Սարգսյանի դեմ քվեարկել միայն նրա համար, որ վերջինս ՀՀԿ-ի թեկնածուն է: Այս մասին նա ասաց այսօր ԱԺ-ում տեղի ունեցած ճեպազրույցի ժամանակ:

Պատգամավորը չշտապեց կանխատեսել՝ արդյոք իրենց խմբակցությանը կհաջողվի՞ համապատասխան ձայներ հավաքել, թե ոչ: «Մենք կանխագուշակումներ չենք անում: Կլինի հանդիպում քաղաքական ուժերի հետ, նրանք կհայտնեն իրենց դիրքորոշումը, և ընդհանուր պատկերը կտեսնենք քվեարկության ժամանակ»,- ասաց Բաղդասարյանը:

Բանախոսը հիշեցրեց, որ Արմեն Սարգսյանը վարչապետի պաշտոնից տարիներ առաջ հեռացել է առողջական լուրջ խնդիրների պատճառով: «Աստված թող բոլորին առողջություն տա: Չկա որևէ մարդ, որ իդեալական լինի: Խորհուրդ կտամ ավելի շատ խոսել Արմեն Սարգսյանի դրական կողմերի մասին: Այն չափորոշիչները, որ ունի նախագահի մեր թեկնածուն, բավական բարձր են: Նախագահի պաշտոնում նման հարուստ կենսագրություն  ունեցող մարդը կարող է շատ արդյունավետ աշխատանք տանել»,- նշեց ՀՀԿ խմբակցության ղեկավարը:

Լրագրողները Վահրամ Բաղդասարյանից հետաքրքրվեցին՝ արդյոք նա hնարավոր համարո՞ւմ է, որ Արմեն Սարգսյանը մերժի ՀՀ նախագահի պաշտոնը ստանձնելու առաջարկը: Ի պատասխան՝ պատգամավորը շեշտեց՝բնական է, որ թեկնածուն ժամանակ է խնդրում՝ կշռադատելու առաջարկը, հանդիպելու քաղաքական ուժերի հետ և միայն դրանից հետո հասկանալու՝ պատրա՞ստ է աշխատել այդ պաշտոնում:

ՀՀԿ խմբակցության ղեկավարն ընդգծեց, որ եթե լինի նախագահի ևս մեկ թեկնածու, իրենք քննարկումներ կկազմակերպեն: «Եթե «Ելք»-ը մեր ստեղծած ընդդիմությունն է, կօգնենք իրենց: Բայց «Ելք»-ը ժողովրդի ընտրյալն է և պետք է պահպանի իր կերպարը: Այլ խնդիր է, եթե իրենք ցանկանում են մեզ հետ համագործակցել, մեր դռները բաց են: Ոչ միայն նախագահի ընտրության, այլ ցանկացած հարցում կարող ենք իրենց հետ համագործակցել»,- ասաց Բաղդասարյանը: