Ձեր վստահելի աղբյուրը

«Սասնա ծռերի» գործով դատավարությունն ընդամենը գործընթաց է, այստեղ օրինականության դաշտում գրեթե ոչ մի աշխատանք դեռ չի կատարվել: Հունվարի 22-ին լրագրողների հետ հանդիպմանը նման տեսակետ հայտնեց «Սասնա ծռերի» գործով պաշտպան Արայիկ Պապիկյանը: Նա նշեց՝ դատարաններում նույն իրավիճակի նկատմամբ յուրաքանչյուրը սեփական լուծում է տալիս, և չի կարելի ակնկալել, որ արդյունքում արդար դատավարության անունից կայացրած դատական ակտ կարող են ունենալ:

Պապիկյանն ասաց, որ պաշտպանական կողմն այս խնդրի մասին մշտապես բարձրաձայնել է, իրենք բարձրացրել են բոլոր խնդիրները՝ դատավարության ընթացքի, դատավորի կողմից կատարվող գործողությունների, պաշտպանական կողմի նկատմամբ ցուցաբերվող վերաբերմունքի առումով:

«Մենք չունենք այն գործընթացը, որ պիտի տեղի ունենար, մեր պաշտպանյալները, որպես ապստամբներ իրենց բողոքի ձայնը բարձրացնելիս նշում են, որ դա բողոքի ձայն էր նաև այն անարդարության դեմ, որ տիրում էր Հայաստանում, դա պիտի հիմք տար իշխանսւթյանը՝ առնվազն դատավարությամբ ապացուցելու, որ դա ճիշտ չէր, իսկ հիմա ապացուցվում է, որ չկա օրենքի տիրապետություն, օրենքը չի իշխում, և իրենք ճիշտ էին՝ Հայաստանում ուղղակի արդար դատավարություն գոյություն չունի»,- ասաց նա:

Պապիկյանը նշեց, որ գործի նյութերում քաղաքական մասը հանված է, և բացառապես քրեական մասն է քննվում: 

«Սասնա ծռերի» գործով պաշտպան Տիգրան Հայրապետյանը նշեց, որ առկա է մի իրավիճակ, երբ օբյեկտիվ իրականության մեջ եղել են դեպքեր, փաստեր, հանրությունը դրանց մանրամասներին ծանոթ է, սակայն քրգործում ունեն բոլորովին այլ վիճակ, մի շարք հակասություններ: Ըստ փաստաբանի՝ ամենասկզբից հենց ամեն ինչ արել են, որ իրենց պաշտպանյալներին լռեցնեն, վերջիններս իրենց ձայնը չբարձրացնեն:

«Ձայնը բարձրացնելու դեպքում սանկցիաներ են կիրառվում: Այս արարքի հիմքում բացառապես ապստամբության իրավունքն է ընկած, և սա, փաստորեն, իշխանությունները ընդունում են: Սանկցիաներ են կիրառվում, որպեսզի քաղաքական հայտարարություններ չլինեն»,- ասաց նա:

«Սասնա ծռերի» գործով պաշտպան Մուշեղ Շուշանյանի գնահատմամբ՝ այս «դատավարությունը» ծայրից ծայր քաղաքական գործընթաց է: Նրա խոսքով՝ այս գործով արդարադատություն իրականացնելու համար պետք է քննվեր ապստամբության գործը:

«Մեր պաշտպանյալները համարում են, որ դա ապստամբություն է, իրենք իրացրել են ապստամբության բնական իրավունքը: Իրենք հայտարարում են, որ ՀՀ-ում ժողովրդին պատկանող իշխանությունը յուրացրած է: ժողովուրդը զրկված է ազատ ընտրությունների եղանակով իշխանություն ձևավորելու, իշխանությունը փոխելու հնարավորությունից, քաղաքացիներին այլ ելք, քան զինված ապստամբությունն է, չի մնում»,- ասաց նա:

Ըստ փաստաբանի՝ թեպետ նախորդ տարվա հոկտեմբեր ամսից մի փոքր տեղաշարժ տեղի ունեցավ այս գործով դատավարության մեջ, իրենց՝ փաստաբանների իրավունքների խայտառակ խախտումները մի պահ դադարեցվեցին, սակայն վերջին դատավարության ընթացքը ցույց տվեց, որ կարծես նորից վերադարձ է կատարվում ռեպրեսիային:

«Մեր պաշտպանյալների նկատմամբ կկիրառվեն սանկցիաներ, մեզ էլ կփորձեն ստիպել, որ մեր պաշտպանյալների իրավունքների խախտումների հետ համակերպվենք, լուռ նստենք դահլիճում, հնարավորություն տանք, որ այդ՝ արդարության հետ որևէ աղերս չունեցող դատավարությունն առաջ տարվի, իսկ եթե փորձենք հակադարձել՝ դրա լուծումն էլ են գտել՝ ներգրավել են պահեստային պաշտպաններ՝ հանրային պաշտպաններ, որ անհրաժեշտության դեպքում նրանց զուտ ֆիզիկական ներկայությունն ապահովելով՝ համարեն, որ մեր պաշտպանյալների պաշտպանության իրավունքն ապահովված է, և դատավարությունն այդպիսով առաջ տանեն»,- ասաց նա:

Շուշանյանը նշեց՝ սա թե մտահոգություն է, թե կանխատեսում՝ հիմնված վերջին նիստերի վրա: Փաստաբանն ընդգծեց նաև այն, որ այս գործով մեղադրյալներին առաջադրված մեղադրանքն անհատականացված չէ, մինչդեռ պետք է անհատականացվեր:

«Սասնա ծռերի» գործով պաշտպան Արա Ղարագյոզյանի համոզմամբ՝ այս գործը քաղաքական պատվեր է, և որևէ դատավոր այս գործով չի կարող արդար դատավարություն իրականացնել, քանի որ բոլորը նույն քաղաքական պատվերն են կատարում, որ իջեցվում է իշխանությունների կողմից: Փաստաբանի խոսքով՝ Սասնա ծռերի գործողությունները եղել են ապստամբություն: Նա նշեց՝ արդեն մեկ տարուց ավելի՝ ապօրինի գործողություններ են իրականացվում, օրինակ՝ կոլեկտիվ մեղադրանքը, մինչդեռ պաշտպանյալները պիտի հասկանան՝ իրենք ինչում են մեղադրվում:

«Մենք ասում էինք՝ չգիտենք՝ մեր պաշտպանյալներն ինչում են մեղադրվում, բայց այդպես էլ մեզ մեղադրանքի էությունը չպարզաբանեցին: Խոշտանգումներն ու վատ վերաբերմունքը պարբերական էին, ինչպես, օրինակ, երբ մեր պաշտպանյալները դատարանի նկուղում խոշտանգվեցին: Մինչև հիմա նա, ով նման գործողություններ է իրականացրել, այլևս չի բարձրանում դահլիճ, սակայն նկուղում շփվում է մեր պաշտպանյալների հետ և նրանց բերում է դահլիճ, որն անթույլատրելի է»,- ասաց նա:

Ղարագյոզյանը խոսեց Սասնա ծռերի անդամների հացադուլի մասին: Նա նշեց, որ տոնական օրերին, իբրև արգելված իր հայտնաբերելով, Արայիկ Խանդոյանին խոշտանգեցին, դեկտեմբերի 30-ից հունվարի 8-ը նա եղել է դաժան և անմարդկային պայմաններում՝ սառնամանիք, բորբոսնած խուց և գարշահոտություն, երբ նրան տեսել է՝ նա սառած էր: Նա ասաց, որ ՄԻՊ-ը գալիս էր, դիտարկում, սակայն այդ օրերին այդպես էլ չէր բարձրաձայնում, թե նա ինչ պայմաններում է պահվում:

Փաստաբանը նշեց, որ Արայիկ Խանդոյանին պատուհանը կոտրած պատժախուց էին տեղափոխել, նույնը կատարվեց Արարատ Խանդոյանի նկատմամբ: Սա, ըստ փաստաբանի, հետապնդում էր Խանդոյանների նկատմամբ, բոլոր միջոցները ձեռք են առնում, որ նրանց կոտրեն, քանի որ նրանք անարդարությունների մասին էին բարձրաձայնում:

Արայիկ Պապիկյանը հավելեց, որ դատարանում տեղի ունեցած խոշտանգման դեպքից ամիսներ են անցել, հրատապ զեկույցներ են հրապարակվել, փաստեր, անուններ են նշվել, սակայն նախաքննական մարմինը մինչ օրս անգամ կասկածյալ չի կարողացել գտնել: Նրա խոսքով՝ միջադեպը սահմանափակ տարածքում է եղել, փոքր թվով մարդիկ, բայց չեն կարողանում գտնել, ուստի նման պայմաններում իրատեսական չէ ասել՝ եկեք այս հարցը լուծենք օրինականության դաշտում. «Ո՞ր օրինականության՝ այն, որ ամեն օր մատուցվու՞մ է մեզ, որ արդարադատության հետ ոչ մի աղերս չունի՞»: