Ձեր վստահելի աղբյուրը

«Լեռնային Ղարաբաղի հակամարտությունը  սառեցված հակամարտություն չէ ու  շատ կարևոր է խնդրին լուծում գտնել»,-ինչպես Փարիզից հայտնում է Panorama-ի լրագրողը այս մասին այսօր Ելիսեյան պալատում կայացած ՀՀ նախագահ Սերժ Սարգսյանի ու Ֆրանսիայի նախագահ Էմանուել Մակրոնի առաջին հանդիպումից հետո կայացած  մամուլի ասուլիսի ժամանակ ասել է Ֆրանսիայի նախագահը։

Մակրոնը նշել է, որ  ԼՂ հարցի լուծումը պետք է լինի «քաջ կոմպրոմիս» երկու երկրների միջև։

Ֆրանսիայի նախագահը հայտարարել է, որ նախագահների և ԱԳ նախարարների մակարդակով հանդիպումները ունեն կարևոր դերակատարում՝ ասելով, որ Կրակովում վերջին հանդիպումը դրական մթնոլորտում է անցել։

«Գիտեմ, որ խաղաղության քարոզումը շատ դժվար է, և ցանկանում եմ, որ հանդիպումները կոնկրետ արդյունքներ ունենան։ Նախագահի հետ հանդիպմանը հաստատեցի, որ Ֆրանսիան հետևում է խնդրի լուծմանը՝ ամերիկյան ու ռուսական գործընկերների հետ»,-ասել է Մակրոնը՝ շնորհակալություն հայտնելով Սերժ Սարգսյանին այցի համար՝ նշելով, որ ընդունում է պետական այցի հրավերն ու կլինի Հայաստանում հոկտեմբերին։

Սերժ Սարգսյանն իր խոսքում ևս նշել է, որ Լեռնային Ղարաբաղի հակամարտությունը մեր տարածաշրջանի զգայուն թեմաներից է։ Նախագահ Սարգսյանը բարձր է  գնահատել Ֆրանսիայի՝ որպես ԵԱՀԿ Մինսկի խմբի համանախագահ երկրի մոտեցումները, երկարամյա ջանքերը՝ ուղղված հիմնախնդրի խաղաղ հանգուցալուծմանը և մեր տարածաշրջանում անվտանգության, կայունության և համագործակցության հաստատմանը։

«Հայաստանը  հանձնառու է շարունակելու համանախագահների միջնորդությամբ բանակցությունները։ Հայտնի է, որ Լեռնային Ղարաբաղի ժողովուրդը պայքարում է ազատության համար, ինքնորոշման համար և այսպիսի պայքարը չի կարող բարեհաջող ավարտ չունենալ»,-ասել է  նախագահ Սարգսյանը։

Նախագահները նաև խոսել են երկկողմ հարաբերությունների հետագա զարգացման, տնտեսական կապերի առավել ակտիվացման մասին։ Էմանուել Մակրոնը նաև ողջունել է  ՀՀ-ԵՄ նոր համաձայնագրի կնքումը, նշելով, որ այն ևս կնպաստի հարաբերությունների զարգացմանը։