Ձեր վստահելի աղբյուրը

«Շուկայական տնտեսության պայմաններում գների պետական կարգավորում, գների պետական վերահսկողություն չի իրականացվում, և ապրանքների գները ձևավորվում են առաջարկի ու պահանջարկի ազդեցության ներքո, գնագոյացման վրա ազդում են բազմաթիվ գործոններ, սկսած ապրանքների արտադրության և ներմուծման ծախսերից, տրանսպորտային տեղափոխման ծախսերից, վերջացրած հարկերի փոփոխություններ և էլի մի շարք տնտեսական գործոններ»,- այսօր գնաճի վերաբերյալ խորհրդարանական լսումների ժամանակ ներկայացրեց ՏՄՊՊՀ նախագահ Արտակ Շաբոյանը։

Նրա խոսքով՝ որպեսզի խոշոր տնտեսվարողներն իրենց մրցակցային առավելությունից օգտվելով գնային չարաշահումներ չանեն, պետությունը որոշակի հսկողություն է իրականացնում նրանց գործունեության նկատմամբ։

«Մասնավորապես մեր հանձնաժողովը մշտապես իր ուշադրության կենտրոնում է պահում սոցիալական կարևոր նշանակության այն ապրանքային շուկաները, որոնք ունեն բարձր կենտրոնացվածություն, այսինքն որտեղ կան գերիշխող դիրք զբաղեցնող տնտեսվարողներ, որպեսզի այդ խոշոր ընկերությունները հակամրցակցային գործողությունների հետևանքով գնային չարաշահում չիրականացնեն»,- ասաց Շաբոյանը։

Նա հայտնեց, որ իրենք այս պահին ամենօրյա կտրվածքով գնային մոնիթորինգ են իրականացնում այդ ապրանքային շուկաներում, զուգահեռաբար տեղեկատվություն են պահանջում այդ ընկերություններից, նրանց գործունեության վերաբերյալ և համեմատության արդյունքում արդեն բացահայտում են՝ գնային փոփոխությունները որքանով են համահունչ կատարվող ծախսերի փոփոխություններին։

«Եթե էական տարբերություններ ենք տեսնում, ապա այդ ուղղությամբ խորացնում ենք մեր ուսումնասիրությունները։ Որպեսզի թյուրիմացություններ չլինեն և մեր կողմից կատարվող ուսումնասիրությունները որևիցե մեկի կողմից կասկածի տակ չդրվեն, մեր հանձնաժողովը որոշել է, որ գնային մոնիթորինգի արդյունքները պետք է տեղադրվեն մեր հանձնաժողովի կայքում։ Այսօր էլ դրանք տեղադրված են, որտեղից հստակ երևում է, որ ապրանքների գներն ըստ կոնկրետ ապրանքատեսակների, տնտեսվարողների, և կոնկրետ այն անվանումներն են նշված, որտեղ մենք իրականացնում ենք մոնիթորինգ»,- ասաց նա։

ՏՄՊՊՀ նախագահը մանրամասնեց, որ այս տարվա ընթացքում սոցիալական նշանակության կարևոր ապրանքային շուկաներից, որտեղ  կան գերիշխող դիրք զբաղեցնողներ, երեք ապրանքատեսակների գծով են եղել գնային բարձրացումներ՝ բենզին, գազ և դիզելային վառելիք. «Մեր գնագոյացման հաշվարկները ցույց են տալիս, որ այս երեք ապրանքների գծով գնային բարձրացումները հիմնականում պայմանավորված են հարկային փոփոխություններով։  Տարվա սկզբին բենզինը բարձրացել է 20 դրամով, ևս 20 դրամով բարձրացել է ավտոմեքենաների լիցքավորման  բնական գազը և 60 դրամով բարձրացել է դիզելային վառելիքը, մեր ուսումնասիրությունները ցույց են տալիս, որ բենզինի և գազի գծով գնային բարձրացումները պայմանավորված են ակցիզահարկի դրույքաչափի բարձրացմամբ, իսկ դիզելային վառելիքի գծով ԱԱՀ է մտել, որ բերել է գների բարձրացման։

Այս երկու օրերի ընթացքում բենզինի և դիզելային վառելիքի գները բարձրացել են, յուրաքանչյուրի մեկ լիտրը բաձրացել է 10 դրամով։ Այս 10 դրամի չափով լրացուցիչ գնային բարձրացումը պայմանավորված է բենզինի և դիզելային վառելիքի ձեռքբերման գների մեծացմամբ»։

Ինչ վերաբերում է վերջին ժամանակահատվածում կատարված այլ գնային փոփոխություններին, Արտակ Շաբոյանն ասաց, որ անցած տարվա ընթացքում գնային բարձրացում տեղի է ունեցել երեք ապրանքների գով՝ կարագ, բենզին և դիզվառելիք։

«Մեր ուսումնասիրությունները ցույց են տալիս, որ կարագի գների բարձրացումը սկսվել է դեռևս 2016-ի սեպտեմբերից և այն ամբողջությամբ պայմանավորված է միջազգային գների ավելացմամբ։ Միջազգային շուկայում տեղի է ունենում կարագի գների նվազեցում, առաջիկա երկու-երեք ամիսների ընթացքում ականկալում ենք կարագի գների նվազում»,- հավելեց նա։