Ձեր վստահելի աղբյուրը

Դատարանի կողմից փաստաբանի նկատմամբ տուգանքի կիրառում նախատեսող իրավակարգավորման դեմ մեկնարկած ստորագրահավաքը փոքր-ինչ ուշացած է: Panorama.am-ի հետ զրույցում նման տեսակետ հայտնեց փաստաբան Հայկ Ալումյանը, ով չի միացել այս նախաձեռնությանը:

«Ընդհանուր առմամբ ամբողջությամբ համամիտ եմ այդ տեքստի հետ, ուղղակի ինձ թվում է՝ հիմա արդեն ավելի կտրուկ միջոցների ժամանակն է: Արդեն ոչ թե հայտարարություն պիտի լիներ, ինձ թվում է՝ մենք արդեն պետք է անցնեինք գործողությունների, ինչպես, օրինակ, Լոռու մարզի փաստաբանները»,- ասաց նա:

Ալումյանը նշեց, որ հայտարարությունը փոքր-ինչ ուշացած էր, քանի որ օրենքն արդեն ընդունված էր, ու պարզ էր, որ հենց այդ տեքստով էլ հաստատվելու, ստորագրվելու է նախագահի կողմից:

Հարցին՝ կմիանա արդյոք նախաձեռնությանը, եթե ստորագրահավաքից անցնեն կտրուկ գործողությունների, փաստաբանը դրական պատասխան տվեց: Նա ընդգծեց՝ միանշանակ համամիտ է այն ամենի հետ, ինչ գրված է՝ բոլոր վերլուծությունների, դժգոհությունների հետ, ուղղակի կարծում է՝ հիմա ավելի կտրուկ գործողությունների ժամանակն է:

«Հայաստանի Հանրապետության դատական օրենսգիրք» Հայաստանի Հանրապետության սահմանադրական օրենքի նախագծով սահմանված՝ դատարանի կողմից փաստաբանի նկատմամբ տուգանքի կիրառում նախատեսող իրավակարգավորման անթույլատրելիության մասին հայտարարությանը միացել են 1354 փաստաբաններ:

ՓՊ մամուլի քարտուղար Ծովինար Խաչատրյանը հայտնել է, որ բողոքի մասին հայտարարությունը կազմվել է 16.01.2018թ. ՀՀ փաստաբանների պալատում կազմակերպված քննարկման ժամանակ:

Օրենքի նախագիծը չեղարկելու պահանջով փաստաբանները դիմել են ՀՀ Ազգային ժողով և կառավարությանը: