Ձեր վստահելի աղբյուրը

ԵԽԽՎ-ում ՀՀ նախագահ Սերժ Սարգսյանի խոսքի՝ Արցախյան հակամարտությանը վերաբերող հատվածում շեշտադրվեցին ամենակարևոր կետերը։ ՀՀ նախագահի ելույթը ցույց տվեց, որ ի հեճուկս Ադրբեջանի բոլոր շահարկումների և ոչ կառուցողական քաղաքականության՝ հայկական կողմը, հաջողությամբ, առանց հիստերիկ պահվածքի և ֆաշիստական շեշտադրումների, պաշտպանում է իր կենսական շահերը։ Panorama.am-ի թղթակցի հետ զրույցում նման տեսակետ հայտնեց Արցախի նախագահի մամուլի քարտուղար Դավիթ Բաբայանը։ 

Մեր զրուցակցի համոզմամբ, ի դեմս ԵԽԽՎ-ում Հայաստանի Հանրապետության նախագահի ելույթի՝ հայկական կողմը ևս մեկ անգամ հստակորեն ցույց տվեց, որ անում է ամեն բան՝ հիմնախնդիրը խաղաղ ճանապարհով կարգավորելու համար։

«Բնական է՝ կարգավորման գործընթացում հիմնական շեշտը պետք է դրվի այն բանի վրա, որ անցյալին վերադարձ չկա։ Արցախի անվտանգությունը կարևոր բաղադրամաս է։ Ամենակարևորն այն է, որ հստակ շեշտադրվում է՝ Արցախը պատմական հայկական տարածք է։ Սա շատ կարևոր է։ Կարևոր է նաև այն, որ շեշտվում է՝ Ադրբեջանի քաղաքականությունը ցեղասպան քաղաքականություն է՝ հիմնված ջարդերի և խտրականության վրա։ Այսինքն՝ ՀՀ նախագահը տվեց հակամարտության պատմաիրավական և քաղաքական հիմքերը։

Այստեղ չկա որևէ տարածքային խնդիր, Արցախյան հակամարտությունը մարդու իրավունքների, ազգերի ինքնորոշման հիմնախնդիր է։ Կարևոր է նաև, որ ՀՀ նախագահը նշում է Արցախի՝ միջազգային գորևծընթացներկ մաս դառնալու մասին»,- ամփոփեց Դավիթ Բաբայանը։
Հիշեցնենք, որ ԵԽԽՎ-ում այսօրվա իր ելույթի ժամանակ ՀՀ նախագահ Սերժ Սարգսյանն ընդգծեց՝ բանակցությունների խոչընդոտը հիմնականում հանդիսանում են բանակցային ելքից Ադրբեջանի առավելապաշտական ու ոչ իրատեսական ակնկալիքները ։

«Եթե միջազգային հանրությունը կարողանա  օգնել Ադրբեջանին՝ ազատվելու պատրանքներից ու գալու իրատեսական դաշտ, ապա մենք կարճ ժամանակում կարող ենք հասնել մեծ հաջողությունների։ Իրոք, այս կոնֆլիկտը խոչընդոտում է մեր ժողովուրդների զարգացմանը, խլում է մարդկային կյանքեր, մեծ նյութական ռեսուրսներ ու անհրաժեշտ է այս հակամարտությունը լուծվի։ Բանակցային պրոցեսին խոչընդոտում է նաև հանգամանքը, որ ձեռք բերված պայմանավորվածությունները չեն կատարվում»,-ասաց նախագահը։