Ձեր վստահելի աղբյուրը

Վերջին օրերի ամենակարևոր իրադարձությունը ՀՀ նախագահի պաշտոնական այցն էր Ֆրանսիա, հանդիպումը այդ երկրի նախագահի և բարձրագույն ղեկավարության հետ, ինչպես նաև ԵԽԽՎ-ում նրա հանդիպումներն ու ելույթը: Այսօր տեղի ունեցած մամուլի ասուլիսի ժամանակ այս մասին ասաց ՀՀԿ մամուլի խոսնակ Էդուարդ Շարմազանովը:

Նրա խոսքով, ԵԽԽՎ-ում ևս մեկ անգամ վերահաստատվեց, որ Հայաստանի Հանրապետությունը հաջողությամբ դիվերսիֆիկացված քաղաքականություն է իրականացնում, այն է՝ լինելով ԵԱՏՄ անդամ, Հայաստանը հաջողությամբ գործակցում է նաև ԵՄ-ի հետ:

«Հայ-ֆրանսիական հարաբերությունները դինամիկ կերպով զարգանում են: Նախագահներ Սարգսյանը և Մակրոնը նշեցին, որ ամեն ինչ անելու են հարաբերությունները զարգացնելու համար: ՀՀ նախագահ Սերժ Սարգսյանը շեշտեց, որ Հայաստանը շարունակելու է ժողովրդավարության զարգացումը, իսկ Ֆրանսիայի նախագահը նշեց, որ Ֆրանսիան մշտապես Հայաստանի կողքին է»,- ասաց Էդուարդ Շարմազանովը:

ԱԺ փոխնախագահի համոզմամբ, շատ կարևոր էր, որ երկու երկրների ղեկավարների հանդիպման ընթացքում անդրադարձ կատարվեց նաև Արցախյան հիմնախնդրին:  «Ֆրանսիայի նախագահ Էմանուել Մակրոնի հետ հանդիպման ժամանակ ՀՀ նախագահը ևս մեկ անգամ ուղիղ նշեց՝ Արցախի պայքարը ազատության պայքար է և չի կարող հաջողությամբ չպսակվել: Մակրոնն իր հերթին նշեց, որ խնդիրը պետք  է լուծվի քաղաքական ճանապարհով՝ պայմանավորվածություններն ի կատար ածելով: Հայաստանը և Արցախը չեն տորպեդահարում այդ պայմանավորվածությունները»,- նշեց քաղաքական գործիչը:

Էդուարդ Շարամազանովը նաև հիշեցրեց՝ եթե մի պահ բոլորս մի քանի տարի հետ գնանք կտեսնենք՝ ինչպիսի բառամթերք էին օգտագործում մեր եվրոպացի գործընկերները Հայաստանի մասին և ինչ բառամթերք են օգտագործում այսօր:

«Եվրոպայի խորհրդի խորհրդարանական վեհաժողովի գլխավոր քարտուղար Թորբյորն Յագլանդը ՀՀ նախագահի հետ հանդիպման ժամանակ ասաց, որ Հայաստանն ընթանում է ճիշտ ճանապարհով: ՀՀ նախագահը մեկ անգամ ևս նշեց, որ մենք անշեղորեն գնալու ենք ժողովրդավարության ճանապարհով: Անդրադարձ կատարվեց նաև կոռուպցիայի թեմային, որը հատուկ է ոչ միայն  մեր նման զարգացող երկրներին, այլ անգամ զարգացած Եվրոպային: ՀՀ նախագահը ԵԽԽՎ բարձր ամբիոնից ափսոսանքով նշեց, որ խավիարն ու նավթադոլարները երբեմն շատ ավելի համոզիչ են, քան ժողովրդավարական ավանդույթները»,- նշեց բանախոսը:

ԱԺ փոխնախագահը կարևորեց, որ ՀՀ նախագահը ԵԽԽՎ-ում երեկ տվեց Արցախյան հիմնախնդրի պատմական քաղաքական և իրավական հիմքերը: «Սերժ Սարգսյանը նշեց, որ այստեղ անհնար է հավասարության նշան դնել ազատ ապրելու իրավունքի համար պայքարող արցախցի ժողովրդի և Սումգայիթում հայերի ջարդեր կազմակերպված ադրբեջանական ղեկավարության միջև: Կասկած չկա, որ Արցախի ժողովրդի պայքարը պսակվելու է հաջողությամբ»,- եզրափակեց ՀՀԿ-ական գործիչը:

Շարմազանովն անդրադարձավ նաև ԵԽԽՎ-ում ՀՀ նախագահի ելույթի՝ հայ-թուրքական արձանագրությունների վերաբերյալ հատվածին՝ նկատելով, որ Հայաստանը բոլոր հարևանների հետ առանց նախապայմանների հարաբերությունների կողմնակից է: «Բայց հայ-թուրքական հարաբերություններում մենք չեն անի քայլեր, որոնք հակասում են հայ-թուրքական արձանագրություններին»,-ասաց նա՝ հիշեցնելով, որ ապրիլյան պատերազմի օրերին Թուրքիան հանցավոր աջակցություն ցուցաբերեց ադրբեջանական կողմին: