Ձեր վստահելի աղբյուրը

Ադրբեջանական կողմի՝ այսօր գիշերը նախաձեռնած դիվերսիոն ներթափանցման փորձը հետևանք է այդ երկրի արատավոր սովորության՝ Հայաստանի մասնակցությամբ յուրաքանչյուր կարևոր հանդիպումից հետո սահմանին սադրիչ գործողություններ կատարել։ Դիվերսիոն ներթափանցման փորձը, անկասկած, հետևանք է նաև ՀՀ նախագահի՝ երեկ ԵԽԽՎ ամբիոնից ադրբեջանցի պատվիրակին հանդարտության կոչի։ Panorama.am-ի թղթակցի հետ զրույցում այս մասին ասաց քաղտեխնոլոգ Արմեն Բադալյանը։

«Դիվերսիոն նախահարձակ գործողություններ Ադրբեջանը նախկինում ևս ձեռնարկել է, երբ ՀՀ նախագահը ԵԽԽՎ-ում նման ելույթներ չէր ունեցել։ Այնպես որ, ասել, որ այդ գործողությունը պայմանավորված է միայն  Սերժ Սարգսյանի ելույթով՝ ճիշտ չէ. դիվերսիոն գործողություններ եղել են նախկինում, կան այսօր և կլինեն նաև վաղը։ Չի բացառվում, որ երեկվա դիվերսիոն գործողությունը ինչ-որ չափով պատասխան էր ՀՀ նախագահի՝ Ադրբեջանի պատվիրակության ղեկավարին կատարված դիտողությանը։ Բայց մեծ իմաստով քանի դեռ ԼՂ հիմնահարցը լուծված չէ, դիվերսիոն ներթափանցման փորձեր երկու կողմից էլ լինելու են»,- ասաց մեր զրուցակիցը։

Արմեն Բադալյանի կարծիքով՝ ԵԽԽՎ-ն վաղուց այն մարմինը չէ, որ կարծիք ձևավորի կամ ազդի Ադրբեջանի ներքին և արտաքին քաղաքականության վրա։ Այն ավելի շուտ խորհրդանշական կառույց է, որտեղ միմյանց են հանդիպում այդ կառույցի անդամ երկրների պատվիրակները։

Հիշեցնենք, որ հունվարի 25-ի գիշերը՝ ժամը 02:00-ի սահմաններում, արցախա-ադրբեջանական հակամարտ զորքերի շփման գծի հարավարևելյան (Կուրոպատկինո) ուղղությամբ տեղակայված հայկական դիրքերից մեկի պաշտպանական հատվածում ՊԲ առաջապահ ուժերի կողմից հավաստանշվել է հակառակորդի հետախուզադիվերսիոն խմբի ներթափանցման փորձ:

Ձեռնարկված կանխարգելիչ գործողությունների արդյունքում ադրբեջանական հատուկ  ջոկատայինները հետ են շպրտվել:

Ըստ նախնական տվյալների՝ իր դիվերսիայի արդյունքում հակառակորդը կրել է կորուստներ: