Ձեր վստահելի աղբյուրը

Պոլսո պատրիարքարանն անորոշության գրեթե տասներորդ տարին է թևակոխում: Այս վիճակը հետևանք է տասը տարի առաջվա անհեռատես քայլերի: Այսօր կայացած մամուլի ասուլիսի ժամանակ այս մասին հիշեցրեց թերթի խմբագիր Արա Գոչունյանը:

«Մենք մեր թերթում այն ժամանակ ահազանգում էինք խնդիրների մասին, բայց մարդիկ ձևացրեցին, որ չեն լսում մեր ձայնը: Այն ժամանակ իրենք իրենց մեջ խաղի կանոններ էին սահմանել և ցանկանում էին այդ կուրսով էլ ամեն բան առաջ տանել»,- նշեց բանախոսը:

Արա Գոչունյանը հիշեցրեց, որ Պոլսո պատրիարքական աթոռը մոտավորապես 550 տարվա պատմություն ունի:

«Այն վարչական լուրջ ավանդույթներով հաստատություն է, որը 1863 թվականին ունեցել է ազգային սահմանադրություն: Սա վարչական մտքի գագաթնակետի դրսևորում է: Հազար ափսոս, որ այսօր հեռացել ենք մեր ունեցած վարչական մտքից և ավանդույթներից: Ազգային սահմանադրությունը ոչ 100 տոկոս ի զորու է, ոչ էլ 100 տոկոսով առկախված: Ներքին խնդիրներ կարգավորելու ժամանակ մենք ենք առաջին հերթին հավատարիմ մնում ազգային սահմանադրության ոգուն և տառին»,- ասաց «Ժամանակ»-ի խմբագիրը:

Արա Գոչունյանը նշեց, որ նույնիսկ մեկ տասնամյակը դժվար թե նորընտիր փոխպատրիարք Գարեգին Բեկչյանին բավարարի բնականոն հունի վրա դնելու Պոլսո պատրիարքարանի աշխատանքները: