Ձեր վստահելի աղբյուրը

Արմեն Սարգսյանը նախագահի լավագույն թեկնածուն է: Հունվարի 25-ին Գրող, հրապարակախոս Մերուժան Տեր-Գուլանյանը նշեց, որ խորին հարգանք ունի բոլոր այն անձանց հանդեպ, ում անունները շրջանառվում էր՝ որպես նախագահի թեկնածու:

Նրա խոսքով՝ բոլորն էլ արժանավոր թեկնածուներ էին, բայց ճշգրիտ մարդը Արմեն Սարգսյանն էր՝ մի մարդ, որը երկար ժամանակ Անգլիայում ապրեց, որին ճանաչում են աշխարհում, սա կարևոր հանգամանք էր:

«Բազմաթիվ մեծ ֆիրմաների խորհրդատու, որքան գիտեմ՝ Անգլիայի թագուհու բոլոր հանդիսավոր ճաշկերույթներին նա, որպես կանոն, հրավիրված է լինում, դա ամեն մարդու հետ չի լինում: Նա ՀՀ վարչապետ աշխատեց 5-6 ամիս, իմ կյանքն այնպես է ստացվել, որ դարձել եմ վկայող, բազում մարդկանց անձնապես եմ ճանաչել և ճանաչում՝ իմ աշխատանքի բերումով՝ որպես գրող, խմբագիր, լրագրող: Առիթ եղել է՝ նստելու, զրուցելու, նաև մի բաժակ խմելու: Ես նրան նաև որպես մարդ եմ ճանաչում, ուրախ եմ, որ նախագահը բոլոր արժանի թեկնածուների շարքից ընտրեց արժանագույնին»,- ասաց նա:

Տեր-Գուլանյանը նշեց՝ Արմեն Սարգսյանը պետք է մեր հանրապետությանը, նա մեծ, հսկայական գործ է թողնում՝ գալով Հայաստան, նաև հսկայական աշխատավարձ է թողնում: Նա հույս հայտնեց, որ Արմեն Սարգսյանը իր «այո»-ն կասի: Հրապարակախոսի կարծիքով՝ Սարգսյանն ընդունելի մարդ է բոլորի համար, իր թիկունքին հսկայական աշխատանքային կենսագրություն ունի և աշխարհաճանաչողություն, իսկ մեր երկրի համար կարևոր է, որ հանրապետության նախագահը աշխարհ ճանաչի, և որ աշխարհը իրեն ճանաչի:

«Ես կարծում եմ՝ փայլուն ընտրություն է»,- ասաց նա:

Քանդակագործ Ֆերդինանդ Առաքելյանը նշեց, որ անձամբ չի ճանաչում Արմեն Սարգսյանին, սակայն որքան լսում եմ նրանց կարծիքները, ովքեր նրան ճանաչում են, բոլորը նրա մասին բարձր են խոսում, հարգանք ունեն դեպի իրեն:

«Ես այն մարդկանցից չեմ, որ ուրիշի ասածով միտքս արտահայտեմ, բայց այստեղ կա մի հարց. եթե երկրի նախագահն ընտրում է իրեն, զգում եմ՝ եռանկյունի են ուզում կազմել՝ այսօրվա վարչապետը և նա: Դա ինձ դուր է գալիս, վերջին հաշվով՝ ինտելիգենտ մարդ է, ժողովուրդն, իհարկե, մի փոքր մտահոգություն ունի, բայց կարծում եմ՝ Աստծո կամոք, այդ մտահոգությունը կփարատվի, որովհետև արդեն շատ է տառապում այս ժողովուրդը, գոնե այս անգամ ճիշտ դուրս կգա»,- ասաց նա:

Քանդակագործը նշեց, որ Արմեն Սարգսյանը փորձ ունի, ճանապարհ է անցել, բայց ինքն ուզում է սպասել ու տեսնել բոլոր հաջողությունները:

Մերուժան Տեր-Գուլանյանի խոսքով՝ կարևոր է նախագահի անձի՝ ով լինելը. Արմեն Սարգսյանը կուսակցական չէ, բացի այդ, նա վեր է բոլոր կուսակցություններից՝ երկրի նախագահն է պարզապես, բոլոր կուսակցությունների նախագահը:

Ֆերդինանդ Առաքելյանը ևս կարծիք հայտնեց, որ թեկնածուի անձը կարևոր է. եթե նա բարձր անձ է, իհարկե, կհաղթահարի մարտահրավերները, որովհետև ճանապարհ անցած մարդ է:

Հարցին՝ ի՞նչ հաջողություններ է գրանցել Արմեն Սարգսյանը՝ որպես դեսպան իր աշխատանքում: Մերուժան Տեր-Գուլանյանը նշեց, որ վերջին մի քանի տարիներին, երբ նա դեսպան էր, առաջին անգամ ջերմություն նկատվեց Անգլիայի և Հայաստանի միջև:

«Եթե ուշադիր եք եղել, Անգլիան շատ սառն էր Հայաստանի հանդեպ: Եվրոպական բոլոր մեծ տերություններն իրենց տեսակետները՝ Ցեղասպանության վերաբերյալ, եթե անգամ Ցեղասպանությունը չեն էլ ընդունել, գոնե հրապարակեցին, բացի Անգլիայից: Ինչ վերաբերում է Արմեն Սարգսյանի դեսպանության շրջանին, այդ տաքությունը երևաց, ջերմություն Անգլիայի և Հայաստանի միջև, բանը հասավ այնտեղ, որ Անգլիայի թագուհին սկսեց հեռագիր տալ, ինչ-որ բան շնորհավորել և այլն, այսինքն՝ արած գործը երևում է»,- ասաց նա:

Տեր-Գուլանյանը նշեց, որ Արմեն Սարգսյանն ամենաճիշտ նախագահն է, և սխալ են պնդումները, թե նա լիազորությունների առումով Անգլիայի թագուհի է:

«Այն օրենքը, որ ԱԺ-ն ընդունում է, եթե նախագահը չի ստորագրում, դա օրենք չէ: Նա կարող է ցանկացած պահի վերադարձնել խորհրդարան՝ լրամշակման կամ փոխելու: Անկեղծ ասած՝ եթե ինքն անկախ չլիներ, չէր գա, ես անձնապես իրեն ճանաչելով եմ ասում»,- ասաց նա: