Ձեր վստահելի աղբյուրը

Ստամբուլում լույս տեսնող «Ժամանակ» օրաթերթը արտերկրում տպագրվող ամենահին թերթն է: Այն հրատարակվում է 1908 թվականից: Այսօր կայացած մամուլի ասուլիսի ժամանակ այս մասին հիշեցրեց թերթի խմբագիր Արա Գոչունյանը՝ հավելելով, որ Հայաստանում թերթի 110-ամյակը նշվելու է վաղը:

Հոբելյանական միջոցառումն ըստ արժանվույն կազմակերպելու համար բանախոսը  երախտագիտություն հայտնեց ՀՀ սփյուռքի նախարր Հրանուշ Հակոբյանին:

Գոչունյանը հիշեցրեց, որ մեկ դարից ավելի պատմություն ունեցող «Ժամանակ»-ն ականատես է եղել պատմական կարևորագույն  իրադարձությունների, այդ թվում՝ վերապրել է Հայոց Ցեղասպանությունը:  Թերթի շատ հողինակներ զոհ են գնացել թուրքական պետության ոճրագործությանը:

Ինչ վերաբերում է թերթի տպաքանակին, ապա այսօր, խմբագրի տեղեկացմամբ, այն մոտ է 1000-1500-ին, այն դեպքում, երբ հիմնադրման օրերին «Ժամանակը» լույս էր տեսնում 15 հազար օրինակով:

Օրաթերթի 110-ամյա ճանապարհորդության ամենամեծ ձեռքբերումը խմբագիրը համարեց խորը ավանդույթների շարունակողը մնալը: «Մենք նաև փորձում ենք ժառանգության վրա ինչ-որ նոր բան ավելացնել»,- շեշտեց խմբագիրը՝ ընդգծելով, որ «Ժամանակ»-ն ակամայից առնչվում է հայ-թուրքական հարաբերություններին՝ որքան էլ դրանք նվազ են կամ աննշմար:

Արա Գոչունյանն ուրախություն հայտնեց, որ թեև փոքր դադարներ եղել են, սակայն այսօրվա դրությամբ «Ժամանակը» փակվելու վտանգի առջև կանգնած չէ: Մինչդեռ  արևմտահայերենի գոյության լուրջ մարտահրավերի առջև է, և Հայաստանում տարեցտարի ավելի լավ են գիտակցում դա:

Panorama.am-ի թղթակցի հարցին՝ ի՞նչ արձագանք է գտել թուրքական մամուլում ՀՀ նախագահի՝ ԵԽԽՎ-ում երեկ վերահաստատած այն  միտքը, որ գարունը դիմավորելու ենք առանց հայ-թուրքական արձանագրությունների, Գոչունյանը պատասխանեց.

«ՀՀ նախագահին հարց տվող թուրք խորհրդարանական Թյուրուլ Թյուրքեշը մինչև վերջերս «Գորշ գայլեր»-ի կոսակցությանն էր պատկանում, սակայն ավելի ուշ անցավ «Արդարություն և զարգացում» կուսակցություն, մի ընթացք զբաղեցրեց Թուրքիայի փոխվարչապետի պաշտոնը: Գործնականորեն որևէ տարբերություն չկա՝ հայ-թուրքական հարաբերություններն ուժի մեջ կմնան, թե ոչ: Մյուս կողմից, Երևանի նախաձեռնությունը չի կարելի ստորադասել: Այս պահի դրությամբ Անկարայի և Երևանի միջև հարաբերությունների բնականոնացման պահը հասունացած չէ, այդ բեկումնային պահից բավականին հեռու ենք»,- նշեց թերթի խմբագիրը: