Կրթության վրա ծախսվող գումարները ոչ թե ծախսեր, այլ ներդրումներ են. ՀԲ Հայաստանի գրասենյակի տնօրեն
«Բարձրագույն կրթության ոլորտում Հայաստանը բարեփոխումների շատ կարևոր փուլ է թևակոխել»,- այս մասին ասել է ՀՀ կրթության և գիտության նախարար Լևոն Մկրտչյանը՝ Համաշխարհային բանկի երևանյան գրասենյակում բարձրագույն կրթության բարեփոխումներին աջակցող փորձագիտական խմբի աշխատաժողովի ժամանակ։
Նախարարը նշել է, որ մշակված «Բարձրագույն կրթության մասին» ՀՀ օրենքի նախագիծը կառավարության կողմից ներկայացվել է Ազգային ժողովի հաստատմանը:
«Օրենքի ընդունումից հետո մենք նոր, առավել արդյունավետ համակարգ ձևավորելու ակնկալիք ունենք և դրան հասնելու համար լուրջ աշխատանքներ պետք է կատարենք: Մեր կարևոր քայլերից մեկը բուհերի դասակարգումն է, որը նպաստելու է բուհերի կառավարման արդյունավետության և հաշվետվողականության բարձրացմանը: Հաջորդը ներքին շարժունության հնարավորությունների ստեղծումն է ինչպես ուսանողների, այնպես էլ պրոֆեսորադասախոսական կազմի համար: Խնդիր է նաև գիտություն-բարձրագույն կրթություն կապը՝ կրեդիտային համակարգի ներդրման համատեքստում: Օրինակ, եթե ուսանողն ուսումնառության ընթացքում պետք է 240 կրեդիտ հավաքի, ապա պետք է հավասարակշռել՝ որքանը բուհերում, որքանը գիտական ինստիտուտներում: Կարևոր է նաև ֆինանսավորման և ուսման վարձավճարների գանձման արդյունավետ համակարգի ներդրումը: Այս բոլոր խնդիրների լուծման համար առաջարկներ մշակելու որոշակի ժամանակ և մասնագիտական վերապատրաստումներ են անհրաժեշտ»,- հավելել է ԿԳ նախարար Լևոն Մկրտչյանը:
ՀԲ Հայաստանի գրասենյակի տնօրեն Սիլվի Բոսութղոն իր խոսքում ընդգծել է, որ համաշխարհային զարգացման տեսլականում առաջնային է դիտվում մարդկային կապիտալի ծրագիրը. «Կրթության վրա ծախսվող գումարները ոչ թե ծախսեր, այլ ներդրումներ են դիտվում: Այսօր արդեն ակնհայտ է, որ գոյություն ունեցող աշխատատեղերի 65 տոկոսն ապագայում փոխվելու է, հետևաբար գլոբալ զարգացումները պայմանավորվելու են մարդկային կապիտալի զարգացմամբ»,-նշել է նա:
Աշխատաժողովի ընթացքում միջազգային փորձագետ Քրիստիան Թորնը ներկայացրել է բուհերի դասակարգման Դանիայի փորձի վրա մշակված մոդելը՝ շեշտելով հատկապես բուհերի հաշվետվողականության բարձրացումը` որպես կառավարման արդյունավետության հիմնական պայման:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
