Ձեր վստահելի աղբյուրը

Panorama․am-ի բացառիկ հարցազրույցը Եվրոպայի խորհրդում ՀՀ մշտական ներկայացուցիչ, դեսպան Պարույր Հովհաննիսյանի հետ։

Panorama․am.Պարոն դեսպան, նախագահ Սերժ Սարգսյանը բարձր մակարդակով հանդիպումներ ունեցավ Եվրոպայի խորհրդում, ինչպես նաև հանդես եկավ ելույթով ԵԽԽՎ-ում։ Ինչպե՞ս կգնահատեք այցի արդյունքները։
Պարույր Հովհաննիսյան. Նախագահի այցը Եվրոպայի խորհուրդ չափազանց կարևոր էր, և հատկապես վերջին տարիներին Հայաստանում տեղի ունեցած լայնածավալ բարեփոխումների վերաբերյալ եվրոպական այս բարձր լսարանին տեղեկացնելու կապակցությամբ։ Այցը բավականին հագեցած էր. բարձրաստիճան հանդիպումներ, որոնք բոլորն անցան շատ ջերմ մթնոլորտում, ելույթ Խորհրդարանական վեհաժողովում, որի արձագանքները վկայությունն են Հայաստանի նկատմամբ հարգանքի և մեր կողմից ստանձնած պարտավորությունների կատարման ուղղությամբ գրանցված հաջողությունների։ Վստահաբար, այս այցը նոր լիցք կհաղորդի Հայաստանի և Եվրոպայի խորհրդի ղեկավարության միջև հաստատված սերտ փոխգործակցությանը և մի շարք ոլորտներում իրականացվող համատեղ աշխատանքներին։

Այցի շրջանակներում ԱԳ նախարար Էդվարդ Նալբանդյանը, Հանրապետության Նախագահի ներկայությամբ, ստորագրեց ԵԽ հինգ կարևոր փաստաթուղթ՝ կոնվենցիաներ կինեմատոգրաֆիայի, հարկային հարցերով վարչական աջակցության, ֆուտբոլային խաղերի և մարզական այլ միջոցառումների ժամանակ անվտանգության և մարդու օրգանների թրաֆիքինգի դեմ պայքարի վերաբերյալ, ինչպես նաև ահաբեկչության կանխարգելման մասին ԵԽ կոնվենցիային կից լրացուցիչ արձանագրությունը։ Անգամ գլխավոր քարտուղար Յագլանդը մատնանշեց, որ երբևէ մի հանդիպման ընթացքում այդքան կոնվենցիաներ չէր ստորագրել։ Հավելեց, որ դա մարդու իրավունքների պաշտպանության հարցում Հայաստանի հանձնառության վկայությունն է։

Հիշեցնեմ, որ օրեր առաջ մենք ստորագրեցինք նաև Կանանց նկատմամբ բռնության և ընտանեկան բռնության կանխարգելման և դրանց դեմ պայքարի մասին ԵԽ կոնվենցիան: Ընդհանուր առմամբ, Հայաստանի կողմից ստորագրված ԵԽ կոնվենցիաների թիվն անցել է 70-ը, և մենք շարունակում ենք աշխատանքներն՝ ուղղված Հայաստանի ներպետական օրենսդրության համապատասխանեցումը համաեվրոպական իրավական համակարգին։

Panorama․am.Պարոն Հովհաննիսյան, այցի շրջանակներում Եվրոպայի խորհրդի կենտրոնակայանի դիմաց տեղադրվեց խաչքար, ինչը շատ խորհրդանշական է՝ ունենալ խաչքար 47 երկիր միավորող կառույցի սրտում։ Ինչպե՞ս հնարավոր եղավ խաչքարի տեղադրումը։
Պարույր Հովհաննիսյան. - 2018թ.-ին նշվում է Մարդու իրավունքների եվրոպական կոնվենցիայի ուժի մեջ մտնելու 65-ամյակը։ Դժվար է գերագնահատել այս իրավական գործիքի նշանակությունը, որով ամրագրված իրավունքներն ու ազատություններն են նաև Հայաստանում իրականացվող համակարգային լուրջ բարեփոխումների հիմքում։

Եվ քանի որ 2018թ. նախատեսվում էր նաև ՀՀ Նախագահի այցը ԵԽ, որոշեցինք, որ դա լավագույն առիթն է այդ հոբելյանը որևէ կերպ նշանավորելու։ Նվերի շուրջ աշխատանքները մեկնարկեցին նախորդ տարվա նոյեմբերին։ Այս ամիսների ընթացքում ՀՀ մշտական ներկայացուցչությունը սերտորեն աշխատում էր ԵԽ արվեստի գործերի կոմիտեի հետ՝ քննարկելու նվերի շուրջ տարատեսակ մանրամասնություններն ու ընթացակարգերը։

Նվերի մի քանի տարբերակ էր քննարկվում։ Ի վերջո, մեր ընտրությունը կանգ առավ 1691թ. թվագրվող խաչքարի կրկնօրինակի վրա՝ որպես հայկական մշակութային ժառանգության նմուշ։ Մեզ հաջողվեց ստանալ ԵԽ համապատասխան մարմինների համաձայնությունը, ինչպես նաև Նախարարների կոմիտեի հավանությունը։ Խաչքարի տեղադրման նպատակով Ստրասբուրգ ժամանեց խաչքարի հեղինակ Արտակ Համբարձումյանը։ Նրա խորհրդակցությամբ և ակտիվ մասնակցությամբ նախաձեռնեցինք խաչքարի տեղադրելու աշխատանքները։

Խաչքարի տեղադրումը կարևոր է ոչ միայն այն առումով, որ այն գտնվում է 47 պետություն միավորող կազմակերպության հենց սրտում, այլ նաև, որ Ֆրանսիայի այս հատվածում՝ պատմական Ալզասում, այն միակ հայկական հուշարձանն է։

Panorama․am- Ինչպի՞սի օրակարգ է սպասվում տարվա ընթացքում։
Պարույր Հովհաննիսյան. -Մենք ակնկալում ենք, որ 2018թ.-ը կշարունակվի հագեցած և ակտիվ օրակարգով, ինչպիսին և տարվա սկիզբն էր։ Եվրոպայի խորհրդի հիմնադրման 70-ամյա հոբելյանին ընդառաջ Նախարարների կոմիտեում ակտիվորեն քննարկվում է ԵԽ ապագայի տեսլականը, ինչպես և, դրա հետ փոխկապակցված, ԵԽ անդամ պետությունների ղեկավարների գագաթնաժողովն անցկացնելու միտքը։ Հիշեցնեմ, որ այս գաղափարին իր լիակատար աջակցությունը հայտնեց ՀՀ Նախագահը։ Մայիս ամսին նախատեսվում է մեր մասնակցությունը ԵԽ տարեկան նախարարական վեհաժողովին, որի քննարկումները նույնպես, վստահ եմ, մեծամասամբ նվիրված կլինեն հենց այս թեմաներին։

Քննարկում ենք նաև Գլխավոր քարտուղարի՝ Հայաստան այցելության հնարավորությունը։ Հաշվի առնելով այն մեծ դերը, որ ունեցել է Եվրոպայի խորհուրդը Հայաստանում սահմանադրական-օրենսդրական բարեփոխումների գործընթացում՝ կարծում եմ այցը կարևոր է այդ օժանդակության արդյունքները տեղում տեսնելու ու գնահատելու տեսանկյունից։

Խոսելով բարեփոխումների մասին՝ պետք է մատնանշեմ այդ համատեքստում ԵԽ հետ 2015-2018թթ. գործողությունների ծրագրի կարևորությունը, որի շրջանակներում և ֆինանսավորվել են ներուժի բարձրացման ծրագրերի մեծամասնությունը։ Հաշվի առնելով այս ծրագրի մոտալուտ ավարտը՝ այս տարի կսկսենք բանակցել ԵԽ գործընկերների հետ նոր շրջանակի ձևավորման ուղղությամբ՝ արդեն իսկ արձանագրված հաջողությունների ամրապնդման մտքով։

Եվ, անկասկած, մենք կշարունակենք աջակցել ԵԽԽՎ-ում հայկական պատվիրակությանը՝ ԵԽ Խորհրդարանական վեհաժողովի հետ դրական օրակարգ ձևավորելու ուղղությամբ։

Հարցազրույցը՝ Աննա Մկրտչյանի