Ձեր վստահելի աղբյուրը

Ազատ ոճի ըմբշամարտի Հայաստանի հավաքականը Հաբեթնակ Կուրղինյանի գլխավորությամբ հունվարի 20-ից փետրվարի 3-ն ուսումնամարզական հավաք է անցկացնում Ծաղկաձորում:

ՀԱՕԿ լրատվականի հետ զրույցում մարզիչն ասել է, որ սա այս տարվա առաջին հավաքն է, որից հետո ըմբիշները փետրվարի 6-ին Իրանում կմասնակցեն «Թախտիի գավաթին»: Այնուհետև ազգային հավաքականն Օլիմպավանում տասնօրյա հավաք կանցկացնի և հանդես կգա Կիևի միջազգային մրցաշարում:

Կուրղինյանի խոսքով, այս երկու մրցաշարերից հետո կսկսեն պատրաստվել Եվրոպայի առաջնությանը, որը տեղի կունենա Կասպիյսկում (Դաղստան) ապրիլի 30-ից մայիսի 6-ը:
«Եթե զգանք, որ որևէ մեկը մրցաշարային պրակտիկայի պակաս ունի, դեռ տարբերակ ունենք՝ Խարկովի մրցաշարը: Մայրցամաքի առաջնությունից առաջ Վլադիկավկազում վերջին հավաքը կանցկացնենք»,-նշել է նա:

Ծաղկաձորում հավաքականի առաջին համարների հետ մարզվում են նաև երիտասարդները՝ ավագ մարզիչ Ավետիք Վարդանյանի գլխավորությամբ: Նրանք հավաքը կավարտեն փետրվարի 1-ին, քանի որ հաջորդ օրը թիմը պետք է մեկնի Մոլդովա՝ միջազգային մրցաշարի:
Հայաստանի հավաքականի անդամներ Գեորգի Կետոևը և Լևան Բերիանիձեն այս օրերին հանդես են գալիս Հնդկաստանի ակումբային առաջնությունում: Նրանք պայքարում են նույն թիմում և բավականին հաջող:

«Ինչպես գիտեք, նրանք Հայաստանում խնդիրներ ունեն կապված մարզումային մրցակիցների հետ: Ծանր քաշերում դա մեր ավանդական խնդիրն է: Հնդկաստանի մրցաշարն ուժեղ կազմ է հավաքել, և մեր մարզիկները լավ պրակտիկա են ձեռք բերում: Նրանք բաց կթողեն Իրանի և Ուկրաինայի մրցաշարերը: «Թախտիի գավաթին» կմասնակցի Անդրանիկ Գալստյանը (125 կգ): 97 կգ քաշային կարգում խնդիրն ավելի բարդ է, քանի որ Շամիր Աթյանն այժմ հանդես է գալիս 92 կգ քաշային կարգում»,-ասել է  Հաբեթնակ Կուրղինյանը:

Ազատ ոճայինների այսօրվա առավոտյան մարզումը սկսվել է դահուկավազքով, ինչը, մարզչի խոսքով, ֆիզիկական օգտակար ծանրաբեռնվածություն է:
Առաջին հավաքի ժամանակ շեշտը դրվում է ընդհանուր ֆիզիկական պատրաստվածության վրա, այնուհետև աստիճանաբար կտեղափոխվեն գորգ: