Ձեր վստահելի աղբյուրը

Փետրվարի 7-ին Հայաստանի պետական սիմֆոնիկ նվագախմբի հետ ելույթ կունենա լիբանանահայ սոպրանո Շողիկ Թորոսյանը։ Այս մասին հայտնում են Հայաստանի պետական սիմֆոնիկ նվագախմբի
հասարակայնության հետ կապերի բաժնից։

Շողիկ Թորոսյանն իր ուրույն դերն ունի Լիբանանի մշակութային կյանքում։ Նա ելույթներով հանդես է եկել աշխարհի տարբեր բեմերում՝ համագործակցելով անվանի երաժիշտների ու կոլեկտիվների հետ։ Նա իր համերգային ծրագրերում, որպես կանոն, հնչեցնում է Կոմիտաս, հոգևոր երաժշտություն, հայ կոմպոզիտորների երգեր ու ռոմանսներ, ինչպես նաև՝ արիաներ հայկական և արևմտաեվրոպական օպերաներից:

Երգչուհին հանդես է գալիս Կիլիկիո Կաթողիկոսության «Շնորհալի» և Համազգայինի «Գուսան» երգչախումբերի կազմում՝ որպես գլխավոր մենակատար: Նա ելույթներ է ունեցել նաև Հայաստանում։ Երգչուհին ձայնագրել է երկու խտասալիկ՝ «Փունջ մե շարականներ» և «Մեղեդիներ, տաղեր և գանձեր» խորագրերով:

Շողիկ Թորոսյանը ծավալում է նաև մանկավարժական գործունեություն. դասավանդում է համազգայինի «Բարսեղ Կանաչյան» երաժշտանոցում և Հայ Ավետարանական կետրոնական բարձրագույն վարժարանում։

Փետրվարի 7-ին երևանյան համերգի ընթացքում հնչելու են Վոլֆգանգ Ամադեուս Մոցարտի, Ֆրանց Շուբերտի, Ջակոմո Պուչինիի, ինչպես նաև հայ կոմպոզիտորների՝ Կոմիտասի, Բարսեղ Կանաչյանի, Տիգրան Չուխաջյանի, Ալեքսանդր Հարությունյանի, Առնո Բաբաջանյանի, Ստեփան Շաքարյանի, Էդգար Գյանջումյանի, Գևորգ Մանասյանի, Գաբրիել Երանյանի, Արտեմի Այվազյանի հանրահայտ երգեր և արիաներ։