Ձեր վստահելի աղբյուրը

Ազատ ոճի ըմբշամարտի 2013 թվականի աշխարհի ու Եվրոպայի չեմպիոն Դավիթ Սաֆարյանը 2016 թվականի Ռիո դե Ժանեյրոյի օլիմպիական խաղերից հետո թողել է գորգը և այլևս հանդես չի գալիս մրցաշարերում: ՀԱՕԿ լրատվականի հետ զրույցում մարզիկն ասել է, որ հնարավոր է մոտ ժամանակներս գորգ վերադառնա:

«Ռիոյից հետո զգացի, որ շատ հոգնած եմ: Մարզիկի կյանքը հեշտ չէ, մշտական հավաքներ, մրցումներ, ըմբշամարտում նաև՝ քաշի կարգավորում: Բացի դրանից, առողջության հետ կապված խնդիրներ առաջացան, և մտածեցի, որ անհրաժեշտ է մարզական կարիերայում դադար վերցնել:
Իհարկե ես շարունակում էի պահպանել մարզավիճակս: Հիմա էլ, Կրասնոդարում մարզադահլիճ եմ հաճախում, որտեղ աշխատում է մարզիչս՝ Աբդուլլա Մագոմեդովը: Այժմ ժամանակն է լիարժեքորեն վերադառնալ մարզումներին, հավաքներին և մրցումներին: Ըմբշամարտը թողնելու մասին երբեք չեմ մտածել: Չեմ ցանկանում հետո զղջալ, որ վաղ հեռացա սպորտից: Դեռ 28 տարեկան եմ, ցանկության դեպքում, մեկ տարի չէ, որ կարելի է պայքարել: Ցանկանում եմ նորից բարձր մակարդակով հանդես գալ:

Կարևորը վերադարձին հոգեբանորեն պատրաստ լինելն է: Ոչ-ոք ինձ չի շտապեցնում և պարտադրում: Որոշում ինքս կկայացնեմ: Մշտական կապ եմ պահպանում Հայաստանի ըմբշամարտի ֆեդերացիայի հետ, շփվում եմ սպորտի նախարար, ՀԱՕԿ գլխավոր քարտուղար Հրաչյա Ռոստոմյանի հետ: Կիրակի օրը ներկա էի հունահռոմեական ըմբշամարտի Հայաստանի առաջնությանը: Շատ հետաքրքիր գոտեմարտեր եղան, հաճույքով հետևում էի, չնայած ինքս ազատ ոճի ըմբիշ եմ: Զգացի, որ անձամբ ուզում եմ գորգ մտնել:

Առաջիկա հավաքներին կցանկանայի միանալ ազգային թիմին: Դեռ չեմ մասնակցել մրցումների, և խոսել Եվրոպայի առաջնության մասին, իհարկե անիրական է: Ցանկություն կա հանդես գալու աշխարհի առաջնությունում (Բուդապեշտ): Հասկանում եմ, որ պետք է անհրաժեշտ մարզավիճակ ձեռք բերել և պատրատ եմ աշխատել: Ներկա պահին 70 կգ եմ, երկու քաշային կարգերի մասին եմ մտածում՝ 65 և 70 կգ: Մարզումային գործընթացը ցույց կտա: Հենց այնպես գորգ վերադառնալ չեմ ուզում, սպորտում պետք է բարձր նպատակներ դնել և ձգտել հասնել դրանց»,-ասել է Դավիթ Սաֆարյանը: