Ոչ մեկիս մոտ իլյուզիա չկար, որ ՀԱԷԿ-ի գործող էներգաբլոկը պետք է ընդմիշտ աշխատեր. Հայկ Հարությունյան

Տնտեսություն 13:04 30/01/2018 Հայաստան

Ոչ մեկիս մոտ իլյուզիա չկար, որ ՀԱԷԿ-ի գործող էներգաբլոկը պետք է ընդմիշտ աշխատեր. Հայկ Հարությունյան

ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանն այսօր լրագրողների հետ ճեպազրույցում անդրադառնալով ՀԱԷԿ-ի վերաբերյալ Եվրամիության դիրքորոշմանը՝ նախ հիշեցրեց, որ ՀՀ-ԵՄ բանակցությունների արդյունքում հստակ ձևակերպվել է՝ Հայաստանը պետք է ներկայացնի գործող էներգաբլոկի ապագործարկման ճանապարհային քարտեզ:

«Կարծում եմ՝ ոչ մեկիս մոտ իլյուզիա չկար, որ գործող էներգաբլոկը պետք է ընդմիշտ աշխատեր: Մենք բավականին մեծ ներդրումներ ենք արել և շարունակում ենք անել անվտանգության ստանդարտների վրա: Ատոմակայանի շահագործման ժամկետի երկարաձգման ծրագրի 300 միլիոն դոլար արժողությամբ ներդրումների մեծ մասը գնում է հենց անվտանգության ստանդարտների բարձրացման վրա»,- ասաց Հայկ Հարությունյանը:

Նրա խոսքով՝ երկրորդ էներգաբլոկի երկարաձգումը նախատեսում են 10 տարի ժամկետով, որից հետո այն կապագործարկվի. «Այստեղ ոչ մի արտառոց բան չկա»:

Հարցին, թե արդյոք այլընտրանքային էներգետիկան կարող է այլընտրանք լինել հայկական ատոմակայանին՝ Հայկ Հարությունյանը նշեց, որ ոչինչ պետք չէ բացառել:

«Ներկա պահին այս ոլորտում զարգացումներն ընթանում են շատ արագ, և ակումուլյացիոն տեխնոլոգիաները բավական արագ են զարգանում, բայց հիմա հստակ չենք կարող ասել»,-ընգդծեց նա:

Նշենք, որ Երևանում այսօր մեկնարկել է էներգետիկայի, տրանսպորտի, շրջակա միջավայրի, կլիմայի գործողության և քաղաքացիական պաշտպանության հարցերով ՀՀ-ԵՄ ենթակոմիտեի 5-րդ նիստը, որի նպատակն ՝ քննարկել համապատասխան ոլորտներում առկա համագործակցության հետ կապված մի շարք հարցեր:

Հարակից հրապարակումներ`

Հայկական ատոմակայանը պետք է հնարավորինս շուտ փակվի. Դիրկ Լորենց

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: