Ձեր վստահելի աղբյուրը

«Առաջին ընթերցմամբ ընդունված Դատական օրենսգիրքը ենթարկվել է մի շարք փոփոխությունների», - ԱԺ պետական-իրավական հարցերի մշտական հանձնաժողովի՝ ընթացող  նիստում հայտնեց արդարադատության նախարար Դավիթ Հարությունյանը։

Խմբագրական ու այլ բազում փոփոխություններից նա կարևորեց 12-ը: Դրանցից մեկն էլ այն է, որ օրենսգրքից հանել են տուգանքի վերաբերյալ կարգավորումները:

«Այդ հարցի կարգավորումը կլինի շատ շուտով, դրանք կներկայացվեն Դատավարության օրենսգրքում իրականացվելիք փոփոխություններում»,-ասաց Հարությունյանը:

Փոփոխության պատճառը բացատրելիս, բանախոսն ասաց, որ նման միջոցները  կոշտ են, հնարավոր է պրակտիկայում լրացուցիչ մեխանիզմների ներդրման անհրաժեշտություն առաջանա:

«Իսկ դա Սահմանադրական օրենքի մակարդակով կարգավորվելու դեպքում շատ ավելի դժվար կլինի անել, քան եթե դա կարգավորենք Դատավարական օրենսգրքով»: Շուտով ձեզ կներկայացնենք երեք դատավարությունների՝ Քրեական, քաղաքացիական, վարչական դատավարությունների վերաբերյալ օրենսդրական փոփոխությունները, որտեղ կնախատեսենք նույն դատական տուգանքները, որոնք կային առաջին ընթերցմամբ ընդունված Դատական օրենսգրքում»,-ասաց նախարարը:

«Ելք»  խմբակցությունից Արտակ Զեյնալյանն ասաց, որ առաջրկելու են, որպեսզի բացառության կարգով փաստաբանների նկատմամբ դատական տուգանք չնշանակվի:

Հիշեցնենք, որ իրավական այս կարգավորման դեմ բողոքում են նաև փաստաբանները, նրանք հայտարարություն են տարածել, հանդիպման խնդրանքով դիմել ԱԺ նախագահին, մի քանի մարզերում էլ  մեկօրյա նախազգուշական գործադուլ են իրականացրել: