Ձեր վստահելի աղբյուրը

ՀՀ քաղաքացիների այն երեխաներին, որոնք 18 տարեկանը լրացած, դեռ դպրոցում են, հնարավորություն է տրվում, որ զինապարտ դառնան դպրոցն ավարտելուց հետո: ԱԺ պատգամավոր Միհրան Պողոսյանը կարծում է, որ «Զինվորական ծառայության և զինծառայողի կարգավիճակի մասին» օրենքի այս դրույթում որոշակի բացթողում կա:

ԱԺ Պաշտպանության և անվտանգության հարցերի մշտական հանձնաժողովի այսօրվա նիստի ժամանակ պատգամավորն ընդգծեց՝ օրենքում վկայակոչված չէ այն հանգամանքը, թե ինչպես պետք է վերաբերվել արտերկրում հանրակրթական կրթություն ստացող ՀՀ քաղաքացիների հետ:
«Առաջարկս հետևյալն է՝ «Զինվորական ծառայության և զինծառայողի կարգավիճակի մասին» օրենքի՝ հոդված 22, 3-րդ մաս, 2-րդ կետում ավելացնել Հայաստանի Հանրապետությունում կամ օտարերկրյա պետություններում հանրակրթական կրթության հիմքի վրա առանց ընդհատման, նախնական կրթական ծրագրով սովորողի արտոնությունը»,- ասաց Միհրան Պողոսյանը:

Հանձնաժողովի ադամ, ՀՀԿ խմբակցության պատգամավոր Ալիկ Սարգսյանը նախագիծն «ընտիր» և «շատ ճիշտ» որակեց:

«Սա իրոք բացթողում է, որը պետք է լրացվի: Ասենք, երեխան գանցել է, Հոլանդիայում դպրոցում է սովորում: Սա հարգելի տարբերակ չի կարելի համարել: Հարկավոր է հարգելի համարել այն տարբերակը, երբ երեխան բարձրագույն  մի այնպիսի ուսումնական հաստատությունում է սովորում, որը միաժամանակ մեր երկրի շահերից է բխում»,- ասաց նա:

Միհրան Պողոսյանն ուղղեց գործընկերեոջը՝ հիշեցնելով, որ առաջարկը ոչ թե բուհերում, այլ հանրակրթական հաստատություններում սովորողների մասին է:

«Մենք բաց ենք թողել երեխաներին, որոնք դրսում են սովորում, այսքանը: Պետք է ավելացնել այս հատվածը, երեխաների այն զանգվածը, որն արտերկրում հնարկրթական կրթություն է ստանում»,- նշեց նա:

ԱԺ Պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանն իր հերթին նկատեց՝ առանց օրենքի լրացման՝ ստացվում է, որ եթե  երեխան սովորում է օտարերկրյա պետության հանրակրթական համարգում, 18 տարեկանը լրանալուն պես, դեռևս ուսումը չավարտած՝ Հայաստանի Հանրապետությունը կարծես թե պարտավորեցնում է վերադառնալ և ԶՈՒ-ում ծառայության անցնել:

«Հիմա այդ հնարավորությունը տրվում է, որպեսզի երեխան ավարտի հիմնական կրթությունը, նոր 19 տարին լրանալուն պես վերադառնա և անցնի զինվորական ծառայության»,- ասաց նա:
«Զինվորական ծառայության և զինծառայողի կարգավիճակի մասին» ՀՀ օրենքում լրացում կատարելու մասին օրենքի նախագծին դրական եզրակացություն տալու հարցը քվեարկության դրվեց և անցավ 6 «կողմ» ձայնով: