Նոր վարչապետի օրոք կառավարության նիստերը կանցկացվեն դռնփակ

Քաղաքական 12:41 01/02/2018 Հայաստան

Նոր վարչապետի օրոք կառավարության նիստերը կանցկացվեն դռնփակ

Գործադիրն այսօրվա նիստում հավանություն տվեց «Կառավարության կառուցվածքի և գործունեության մասին» ՀՀ օրենքի նախագծին, որն օրենքով սահմանված կարգով կներկայացվի ԱԺ:

ՀՀ արդարադատության նախարար Դավիթ Հարությունյանը ներկայացնելով նախագիծը` նշեց, որ կառավարությունը կազմված է լինելու վարչապետից, առաջին փոխվարչապետից, երկու փոխվարչապետներից և նախարարներից: Ըստ նրա՝ կառավարությունը համարվելու է կազմավորված, եթե նշանակվել են կառավարության անդամների առնվազն 2/3-ը:

Ըստ Դավիթ Հարությունյանը՝ կառավարության կառուցվածքում ընդգրկվելու են 18 նախարարություններ. «Օրենքում նախատեսում ենք հավելվածի տեսքով նրանց գործունեության հիմնական ոլորտները, հակառակ դեպքում ուղղակի անունների թվարկումը կարծում ենք օրենքը կդարձներ ավելի թերի»:

Բացի այդ, ըստ նրա, սահմանում են կառավարության անդամի կողմից նոր՝ երդում տալու պահանջը, հաշվի առնելով այն հանգամանքը, որ պատգամավորները, դատական իշխանության ներկայացուցիչները տալիս են երդում:

Սահմանվել են նաև այն դեպքերը, որոնց պարագայում վարչապետը պարտավոր է ներկայացնել հրաժարական:

Անդրադառնալով կառավարության նիստերին՝ Դավիթ Հարությունյանը հայտնեց, որ օրենքով սահմանվել է՝ կառավարության նիստերը դռնփակ կանցկացվեն: Նախարարի խոսքերով՝ աշխարհում բոլոր երկրների կառավարություններն իրենց նիստերը գումարում են դռնփակ, և միայն այն դեպքում, երբ անհրաժեշտ է հանրությանը տեղեկացնել որոշակի հարցի վերաբերյալ՝ վարչապետի որոշումներով կառավարության նիստերի մի մասը կանցկացվի դռնբաց:

Այդուհանդերձ, ըստ նրա, կառավարության գործունեության թափանցիկությունն ապահովելու համար նախատեսվում է, որ վարչապետը պարտավոր է ապահովել հանրությանը կառավարության գործունեության վերաբերյալ տեղեկատվության փոխանցումը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: