Ձեր վստահելի աղբյուրը

Հայաստանի մշտական բնակչության թիվը 2018-ի հունվարի 1-ին կազմել է  2 մլն 972 հազար 900, մինչդեռ 201թ-ի հունվարի 1-ին այն կազմում էր 2 մլն  986 հազար 100:

ՀՀ ազգային վիճակագրական ծառայության հրապարակած տվյալների համաձայն՝  1 մլն 76.4 հազար մարդ ապրում է մայրաքաղաք Երևանում:  Առավել մեծ թվով բնակչություն ունեն Արմավիրի ու Արարատի մարզերը՝  համապատասխանաբար 257 հազար 400 և 265 հազար 400, ամենաքիչ բնակչությունը Վայոց Ձորինն է՝ 49 հազար 800:

Մշտական բնակչության միջին տարիքը 2017թ. տարեսկզբի դրությամբ կազմել է 36.2 (2016թ.՝ 35.9) տարի, տղամարդկանց համար` 34.3 (2016թ.՝ 34.1), իսկ կանանց համար` 38.0 (2016թ.՝ 37.6 ) տարի:
ԱՎԾ-ի հրապարակած տվյալների համաձայն՝ 2017թ. հունվար-դեկտեմբերին բնակչության կենսունակության գործակիցը` ծնվածների և մահացության դեպքերի հարաբերակցությունը, կազմել է 137.8%, 2016թ. նույն ժամանակաշրջանի 143.8 %-ի համեմատ:

Նշենք, որ 2017 թ-ին Հայաստանում ծնվել է 37 հազար 699 երեխա, 2016 թ-ին՝ 40 հազար 592, 2015 թ-ին՝  41 հազար 763 երեխա:

Ըստ վիճակագրության՝ 2017թ. հունվար-դեկտեմբերին հղիության հետ կապված բարդություններից, ծննդյան և ետծննդյան ժամանակահատվածում գրանցվել է մայրական մահացության 3 դեպք, որոնցից երկուսը պայմանավորված են եղել անուղղակի (էստրագենիտալ՝ գլխուղեղի և արյան շրջանառության համակարգի հիվանդություններով), իսկ մեկը՝ ուղղակի մանկաբարձական պատճառով (հետծննդյան արյունահոսություն): Մայրական մահացության գործակիցը 2017թ. հունվար-դեկտեմբերին կազմել է 7.2 միավոր, 100 000 կենդանի ծնվածի հաշվով:

Վիճակագրությունից նաև տեղեկանում ենք, որ հանրապետությունում 2017թ. հունվար-դեկտեմբերին գրանցված 1 000 ամուսնությունների համեմատ արձանագրվել է ամուսնալուծության 259 դեպք` 2016թ. հունվար-դեկտեմբերին արձանագրված 224-ի համեմատ: