Ձեր վստահելի աղբյուրը

Երևանի ավագանու «Ելք» դաշինքի անդամ Ալեն Սիմոնյանը Change.org կայքում ստորագրահավաք է նախաձեռնել, որով առաջարկում է հողին հանձնել ռուս հեղափոխական գործիչ և բոլշևիկ, Հոկտեմբերյան հեղափոխության առաջնորդ, ԽՍՀՄ առաջին ղեկավար Վլադիմիր Իլյիչ Լենինի աճյունը: Հանրագիրն ուղղված է ՌԴ Պետդումային և  ՌԴ նախագահին:

Դրանում, մասնավորապես, ասված է.
«Արդեն մեկ դար մահացած մարդու դին հողին հանձնելը ճիշտ է էթիկական, մարդկային և քրիստոնեական տեսանկյունից:
Լենինի մարմնի պահպանումը երկրին արժենում է տարեկան 13,081,000 ռուբլի: Լենինի մարմնի պահպանումն ունի նաև քաղաքական բաղադրիչ, ամրացնում է անձի պաշտամունքի գաղափարը և ազդում երկրի հեղինակության վրա:
Եվ այլն»:

Panorama.am-ի թղթակիցը երևույթի շուրջ զրուցեց Միջազգային և անվտանգության hարցերի հայկական ինստիտուտի հիմնադիր նախագահ, քաղաքական վերլուծաբան  Ստյոպա Սաֆարյանի հետ՝ հետաքրքրվելով՝ որքանո՞վ է նպատակահարմար ռուսական կողմից Գարեգին Նժդեհի արձանի ապամոնտաժման  խոսակցությունների ֆոնին պատասխան այսօրինակ նախաձեռնություն սկսել։

Մեր զրուցակիցն ընդգծեց՝ Ռուսաստանում պետք է իմանան, որ Հայաստանում ևս կան որոշակի տրամադրություններ, թեկուզ՝ ոչ պաշտոնական։ «Նրանք պետք է տեսնեն, որ հասարակական-քաղաքական տրամադրությունները Հայաստանում թույլ չեն տա ԽՍՀՄ-ի ֆետիշացում, որը մտնում է  Ռուսաստանի մեծապետական ծրագրերի մեջ։ Իսկ Ռուսաստանը փորձում է խաղալ մարդկանց կարոտաբաղձության վրա, հերոսացնել Ստալինին և խորհրդային կարգերը և արդարացնել խորհրդային կայսրության սահմաններում նոր կայսրության ստեղծումը։

Իհարկե, ոչ ռուսներն են հասնելու Նժդեհի արձանի ապամոնտաժմանը, ոչ էլ մենք ենք Երևանից թաղելու Լենինին, բայց համենայն դեպս Ռուսաստանում պետք է հասկանան, որ Հայաստանում թույլ չեն տա վերադարձ կարգերի, որոնց տուժածն է հայ ժողովուրդը»,- ասաց քաղաքական վերլուծաբանը։