Բաղանիսը նոր մանկապարտեզ կունենա

Հասարակություն 17:39 03/02/2018 Հայաստան

Բաղանիսը նոր մանկապարտեզ կունենա

Սահմանամերձ Բաղանիսում 2018 թ. նոր մանկապարտեզ կկառուցվի: Panorama.am-ին Բաղանիսի գյուղապետ Նարեկ Սահակյանը որոշ մանրամասներ պատմեց. Բաղանիսում մանկապարտեզ եղել է, սակայն խորհրդային միության փլուզումից հետո դադարել է գործել, նաև՝ որ ադրբեջանական հենակետերի գնդակոծության տակ է հայտնվել և շենքը դարձել է ոչ պիտանի:

«2013 թ. հունիսի 1-ից գյուղապետարանի շենքում մեկ սենյակ հարմարեցրել ենք մանկապարտեզի պարապմունքները կազմակերպելու համար, գյուղապետարանի շենքում առայսօր, արդեն չորրորդ տարին է՝ գործում է մանկապարտեզ, համայնքի միջոցներով պահում ենք երկու աշխատող: Տարբեր դոնորական կազմակերպությունների միջոցով ձեռք ենք բերել գույք, սնունդ, և այլն, բոլոր անհրաժեշտ պայմանները կան»,- ասաց նա:

Սահակյանը նշեց, որ ԱՄՆ-ում գործող «Փարոս» հիմնադրամի միջոցով և Կարմիր խաչի միջազգային կոմիտեի հետ համատեղ նախատեսված է այս տարի մանկապարտեզի նոր մասնաշենք կառուցել՝ ապաստարանով, 110 քմ ընդհանուր մակերեսով: Գյուղապետը նշեց, որ սպասում են՝ եղանակը տաքանա, ու արդեն կկառուցվի նոր մանկապարտեզի շենքը: Պլանավորված է շենքի կառուցումն ավարտել մինչև տարեվերջ, որ կարողանան արդեն այնտեղ պարապմունքները կազմակերպել:

«Մեզ ուրախացնում է նաև այն փաստը, որ այս պահին 18 սան ունենք, իսկ մյուս տարի կունենանք արդեն 23 սան»,- ասաց նա:

Սահակյանի խոսքով, մանկապարտեզը համայնքի տնօրինման տակ է լինելու, միայն սնունդի ապահովման հարցով են օգնելու՝ ֆինանսական մասով, մնացած հարցերը կազմակերպվելու են թե համայնքի, թե անհատ-դոնորների ու կազմակերպիչների միջոցով: Ընթացքում էլ մանկապարտեզը տարբեր ծրագրերի մեջ է ընդգրկվում, և կարողանում են պարապմունքները ձմռանը նորմալ տաք պայմաններում ապահովել:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: