Ընթացիկ դարաշրջանը պատմագրության մեջ կկոչվի «խառը կանաչու» դարաշրջան. Նիկոլ Փաշինյան

Քաղաքական 20:34 05/02/2018

«Ելք» դաշինքի՝ թանկացումների դեմ երկրորդ հանրահավաք-երթի ավարտին ելույթ ունեցավ դաշինքի ղեկավար, ԱԺ պատգամավոր Նիկոլ Փաշինյանը: «Պատմագրության մեջ կան դարաշրջաններ՝ բրոնզե, երկաթե, բայց ես կարծում եմ՝ մեր ընթացիկ դարաշրջանը պատմագրության մեջ կկոչվի «խառը կանաչու» դարաշրջան: Նախորդ հավաքից հետո թանկացումները հասել են արդեն դպրոցական բուֆետներին, թանկացումների պրոցեսը ծավալվում է մարզերում՝ սննդամթերքը, դիզվառելիքի վառելանյութի թանկացումները բերում են նոր թանկացումների, մեզ ասում են՝ զատո խառը կանաչին էժանացել է 30 տոկոսով, սոխն էլ, և այս հակակշռով նրանք ստանում են ընդամենը 2,6 տոկոս գնաճ, որի արդյունքում հայտարարում են, թե ոչ մի սարսափելի բան տեղի չի ունեցել»,- ասաց նա:

Փաշինյանը նշեց՝ ըստ էության այսօր իրենց ասում են մեկ բան՝ աղքատների հետ ինչ պետք է տեղի ունենար, արդեն տեղի է ունեցել, ավելի վատ բան չի լինի, ասում են՝ նրանք իմունիտետ ունեն, կարտոֆիլ կուտեն, խառը կանաչի, կանաչ սոխ, սխտոր և այսպես շարունակ: Քաղաքական գործիչը նշեց՝ այս մոտեցումն անթույլատրելի է, ի վերջո, ամեն ինչին այլընտրանք կա, արտագաղթը ևս կարող է այլընտրանք լինել, սակայն լուծումը դա չէ:

«Խնդիրը հետևյալն է, որ Հայաստանի տնտեսությունը լինի մրցունակ, դիմադրողական, որովհետև Նոր Զելանդիայում մի ֆերմեր որոշում է մի բան էն չանի, Հայաստանում կարագի կինը թանկանում է, իսկ դրանից Հայաստանում կաթնարտադրությամբ զբաղվողը չի շահում»,- ասաց նա: Փաշինյանը հույս հայտնեց, որ վաղը Ազգային ժողովում կհավաքվի արտահերթ նիստ հրավիրելու համար անհրաժեշտ 27 պատգամավորի ստորագրություն, և մյուս շաբաթ արտահերթ նիստը տեղի կունենա:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: