Ձեր վստահելի աղբյուրը

Ազգային ժողովում թանկացումների մասին լսումներն իբր դրանք մեղմելու մասին էին, բայց դարձան ծաղրելիք: Փետրվարի 5-ին Երևանում ընդդեմ թանկացումների հրավիրված հանրահավաք-երթի մեկնարկին այս մասին նշեց ԱԺ «Ելք» խմբակցության անդամ Էդմոն Մարուքյանը: Նա նշեց, որ ի պատասխան իրենց դժգոհության՝ խորհրդարանում լսումների ժամանակ հայտարարվեց, թե գիտնականները պարզել են, որ կարագն ավելի օգտակար է, քան ձեթը, և դա է պատճառը, որ կարագը թանկացել է:

«ԱԺ հարցուպատասխանի ժամանակ վարչապետն ասում է՝ հարևան երկրներում ավելի վատ է վիճակը, մեր տնտեսությունը աճում է, գնաճը համեմատաբար ցածր է, իրենց տնտեսությունը չի աճում, գնաճը բարձր է: Մեզ բերում են համեմատություններ, որ իրականության հետ կապ չունեն, ասում են՝ բենզինը Վրաստանում ավելի թանկ է, այնինչ այդպես չէ: Ասում են՝ բենզինը թանկացել է, գազով երթևեկեք, գազը թանկացել է՝ ոտքով երթևեկեք, հիմա կատակում են՝ կոշիկն էլ է թանկացել, ոտքով գնալն էլ է դժվարանում»,- ասաց նա:

Մարուքյանի խոսքով՝ քաղաքացիները իրենց համախմբվածությամբ պետք է լուծեն այս խնդիրը: Պատգամավորը կրկին ընդգծեց՝ հունվարի 1-ից սկսած թանկացումները ակցիզային հարկի արդյունք են, և ցինիզմ է այն, որ այս օրերին՝ այս թանկացումների ֆոնին, բենզինը նորից թանկացնում են: Մարուքյանի համոզմամբ՝ առանց քաղաքացիների մոբիլիզացիայի, հանրային ճնշման մեխանիզմների, որևէ բան հնարավոր չէ անել: Նա նշեց, որ իրենք ունեն հստակ քայլեր, մոտեցումներ, որոնք հերթականությամբ կյանքի են կոչվում:

«Ելք»-ը հարկային փոփոխությունների նախագիծ է պատրաստել, որով ցանկանում են ակցիզային հարկը բերել մինչև հունվարի 1-ն եղած դրույքաչափերին: Պատգամավորը նշեց՝ քաղաքացու որևէ եկամուտ չի ավելացել, պետական աշխատավարձերը, նպաստները, թոշակները չեն ավելացել, մասնավորում էլ չկա նման տենդենց, այսինքն՝ աշխատավարձերը չավելացնելով՝ հարկային բեռն ավելացրել են, հետևաբար եկամուտները նվազել են: «Հանրային այս ճնշումը մենք ուղղելու ենք ԱԺ-ին:

Վաղը ԱԺ-ում կկազմակերպվի ստորագրահավաք, որի արդյունքում պետք է հրավիրվի մեկ արտահերթ նիստ՝ հարկային օրենսգրքում փոփոխություններ իրականացնելու օրակարգով: Մենք պետք է ունենանք քաղաքացիական գիտակցություն, իրենց ուժին վստահող, պայքարող քաղաքացիներ, սրա արդյունքում մոբիլիզացիան կարող է արդյունավետ լինել»,- ասաց նա: