Ձեր վստահելի աղբյուրը

Հայ ականավոր պետական ու ռազմական գործիչ, Առաջին Հանրապետության ներքին գործերի նախարար Արամ Մանուկյանի արձանի տարբերակների ընտրության թափանցիկությա հետ ապված որոշ խնդիրներ են եղել: Լրագրողների հետ այսօր կայացած մամուլի ասուլիսի ժամանակ այս մասին ասաց Երևանի ավագանու «Ելք» խմբակցության անդամ Արայիկ Հարությունյանը՝ հիշեցնելով, որ մրցութային հանձնաժողովի մի քանի անդամներ՝ Անուշ Տեր-Մինասյանը և Հաղթանակ Շահումյանը, հայտարարել են՝ ներկայիս տարբերակն առաջին փուլում չի եղել, անցկացվել է միայն երկրորդ փուլով:

«Ինձ համար շատ տարօրինակ է, որ քաղաքապետարանն իր կողմից այս տարբերակն է ուղարկել: Աղմուկից հետո, որ բարձրացավ լրագրողների շնորհիվ ես չհանդիպեցի որևէ մեկին, որ դրական կվերաբերեր արձանի այս տարբերակին: Մինչդեռ իշխանությունը փորձում է իր վրայից գցել պատասխանատվությունը: Իմ կարծիքով, բավականին անհաջող տարբերակ է, այն անցել է հիմնականում ՀՀԿ-ի ձայների շնորհիվ»,- ասաց նա:

Արայիկ Հարությունյանը տեղեկացրեց, որ արձանի դրոշի հատվածի գունավոր քարերը բերվել են Մեծ Բրիտանիայից, ինչը հուշում է, որ այն բավական ծախսատար քանդակ է լինելու: Երևանի ավագանու անդամը նաև նշեց, որ Երևանի ավագանու ՀՀԿ-ական անդամ Լևոն Իգիթյանը լուրջ լոբբինգ է իրականացրել, որպեսզի Դավիթ Մինասյանի վիճահարույց էսքիզը հաղթող ճանաչվի: «Ես տեղեկություն ունեմ, որ Լևոն Իգիթյանը լինելու է այս նախագծի ճարտարապետը: Ամսի 13-ին պետք է կայանա նախագծի քվեարկությունը»,- հիշեցրեց բանախոսը՝ ընդգծելով, որ դրա չեղարկման համար պետք է հանրային լուրջ ճնշում բանեցվի:

Ասուլիսին ներկա, Նկարիչների միջազգային միության անդամ Սուրեն Խորենյանն իր հերթին նկատեց, որ արվեստի գործերը չպետք է քննարկվեն ժողովրդի, ոչ մասնագետների կողմից: Նրա համոզմամբ, իհարկե, արվեստը ծառայում է մարդկանց, սակայն եթե հաշվի առնեին ժողովրդի կարծիքը, այսօր, օրինակ, Էյֆելյան աշտարակը գոյություն չէր ունենա: Մինչդեռ այսօր այն Փարիզի պարծանքն է:

«Ցանկացած արձան, որի վրա աշխատում են, անցնում է տասնյակ փուլեր: Որ մենք Արամ Մանուկյանի արձանը վաղուց պետք է ունենայինք, կասկածից վեր է: Լավ է ընտրված նաև արձանի տեղակայման վայրը: Համոզված եմ, որ ընթացքում այն հարյուր անգամ փոփոխությունների է ենթարկվելու: Արվեստագետը և պատվիրատուն պետք է աշխատեն իրար հետ»,- ասաց գեղանկարիչը: