Ձեր վստահելի աղբյուրը

«Վերջին շրջանում ՀՀ կառավարությունը չի զլանում ամեն օր տարբեր անակնկալներով զայրացնել ու զարմացնել մեր ազգաբնակչությանը»,- այսօր ԱԺ հայտարարությունների ժամին իր ելույթում ասաց «Ծառուկյան» խմբակցության պատգամավորի Գևորգ Պետրոսյանը։

Նրա խոսքով՝ վերջին զարմանահարույց որոշումը կառավարության կողմից հավանությունն էր օրենքի նախագծին, համաձայն որի, այսուհետ պետք է կառավարության նիստերը անցկացվեն դռնփակ։

«Ինձ համար հարց է առաջանում, ումի՞ց են գաղտնի պահում, ի՞նչ են գաղտնի պահում, ումի՞ց թաքուն ինչ են ուզում որոշել։ Ի վերջո կառավարության դասական էությունն ու առաքելությունը ԱԺ ընդունած օրենքների ի կատար ածումն է կյանքում, ուրիշ ոչինչ։ Հիմա եթե Ազգային ժողովը գործում է հրապարակային, ինչու է կառավարությունը ոչ հրապարակային մթնոլորտում ուզում կյանքի կոչել այդ օրենքները»,- ասաց պատգամավորը՝ հավելելով, որ առավել զարմանալի են դրա վերաբերյալ բերվող հիմնավորումները։