Ձեր վստահելի աղբյուրը

ՀՀ արդարադատության նախարար Դավիթ Հարությունյանը համոզված է՝ կառավարության որոշումները միանշանակորեն պետք է հրապարակվեն և մեկնաբանվեն: Այս մասին նա ասաց այսօր՝ ԱԺ-ում լրագրողների հետ զրույցում: 

«Մենք քայլեր ենք ձեռնարկում թափանցիկության, հանրային կարծիքը հաշվի առնելու առումներով: Կառավարության որոշումները պե՞տք է հրապարակվեն՝ միանշանակ:  Բուն հարցի քննարկումը կառավարությունում միայն այդ մասին է վերաբերում, երբ մենք առաջարկում ենք, որ նիստը տեղի ունենա դռնփակ: Հակառակ պարագայում քննարկում փաստացի տեղի չի ունենա»,- ասաց նախարարը:

Դավիթ Հարությունյանը մեկ անգամ ևս շեշտեց՝ լրագրողների ներկայությունն էապես կաշկանդում է նախարարներին: Նրա համոզմամբ, դռնբաց նիստերը հակաժողովրդավարական է: «Գնահատականները կարող են տարբերվել՝ ինչն է ժողովրդավարական, ինչը ոչ: Իմ կարծիքով՝ դռնբաց նիստերը հակաժողովրդավարական են, որովհետև քննարկումը սահմանափակվում է նեղ շրջանակով, այնինչ ցանկացած հարց պետք է քննարկվի կառավարության բոլոր անդամների մասնակցությամբ: Նախարարները պետք է լսեն կողմ ու դեմ կարծիքները, արտահայտեն իրենց դիրքորոշումը: Կառավարությունը կոլեգիալ մարմին է»,- ասաց Արդարադատության նախարարը:

Դավիթ Հարությունյանի խոսքով, նախարարներից ում էլ հարցնեք՝ կաշկանդված է տեսախցիկների ներկայությունից, բացասական պատասխան կտա: «Բայց հավատացեք, որ մարդիկ կաշկանդվում են: Դուք էլ կկաշկանդվեք, եթե ձեր վրա տեսախցիկ ուղղված լինի: Ավելի կաշկանդված կլինեք, քան հիմա, երբ տեսախցիկն իմ վրա է ուղղված»,- ասաց Դավիթ Հարությունյանը:

Նախարարի խոսքով՝ ինքը ուսումնասիրել է դասական կառավարությունների գործունեության կարգը: Մասնավորապես, Միացյալ Թագավորությունն ունի «Նախարարների վարքագիծ», որտեղ սևով սպիտակի վրա գրված է՝ կառավարության նիստերը պետք է անցկացվեն դռնփակ, առանց լուսաբանման՝ նախարարների անկեղծ ու անկաշկանդ քննարկումը կազմակերպելու համար:

«Եթե մենք սպասում ենք որակ, սպասում ենք, որ յուրաքանչյուր նախարար պատասխանատու լինի ոչ միայն իր ոլորտի, այլև ամբողջ կառավարության աշխատանքի համար, պետք է իր ասելիքը ունենա իր գործընկեր նախարարի ոլորտում: Սպորտի նախարարը, օրինակ, պետք է իր կարծիքն արտահայտի նույն արդարադատության ոլորտում: Այսօրվա պատկերն այլ է: Նախարարների միջև լինում են բախումներ, բայց այս տարիների ընթացքում դուք չեք տեսնի նման երևույթ»,- շեշտեց Դ. Հարությունյանը:

Ըստ նախարարի՝ նախկինում, երբ կառավարության նիստերը դռնփակ էին, դրանք ընթանում էին 4-6-8 ժամ, իսկ հիմա՝ առավելագույնը 45 րոպեից 1 ժամ:

Արդարադատության նախարարի խոսքով, այն է, որ լրատվամիջոցները, որոնք դեռ կայացման փուլում են, ուշադրություն են դարձնում կեղծ սենսացիաների, հայացքների, քան բովանդակային հարցերի վրա, ինչը չի կարող չանդրադառնալ նախարարների աշխատանքի վրա:

«Մենք շատ ավելի անկաշկանդ քննարկում կունենանք, եթե քննարկում ունենանք փակ սենյակում, ոչ թե տեսախցիկների առջև: Ես չեմ հիշում որևէ որոշում, որտեղ որևէ նախարար քվեարկած լինի դեմ, իսկ փակ նիստերում մենք ունեցել ենք դեմ, կողմ արտահայտվող նախարարներ: Այսօր նման երևույթ այսօր չկա»,- ասաց նախարարը:

Դավիթ Հարությունյանն ընդգծեց, որ կառավարության նիստերը դռնփակ իրականացնելու առաջարկ ինքը ժամանակին արել է ՀՀ նախկին վարչապետ Հովիկ Աբրահամյանին, բայց վերջինս հրաժարվել է այդ աշխատաոճից: Առաջարկել է նաև վարչապետ Կարեն Կարապետյանին, ով մտածելուց հետո համաձայնել է առաջարկին:

«Հովիկ Աբրահամյանը մտահոգ էր, որ հասարակությունը չի ընկալի սա, լրատվամիջոցները չեն ընկալի: Երբ Կարեն Կարապետյանը դարձավ վարչապետ ասաց, որ ժամանակ է պետք իր կարծիքը հայտնելու: Մեր բանավեճերը դարձել են ոչ բանավեճ, դուք բանավեճ կառավարության նիստում չեք տեսնում,  իսկ դա վատ է, որովհետև բանավեճն է ծնում ճշմարտությունը»,- նշեց նա:

Հիշեցմանը, թե նախկին վարչապետ Տիգրան Սարգսյանը հրաժարվեց դռնփակ նիստերը անցկացնելու սովորույթից՝ պատճառաբանելով, որ ավելի ժողովրդավար է, որ դրանք լինեն բաց, Դավիթ Հարությունյանը նշեց՝ ժողովրդավարության մեկնաբանությունները տարբեր են: