Ձեր վստահելի աղբյուրը

ՀՀԿ մամուլի քարտուղար Էդուարդ Շարմազանովը նորմալ է գնահատում հայ ականավոր պետական ու ռազմական գործիչ, Առաջին Հանրապետության ներքին գործերի նախարար Արամ Մանուկյանի արձանի վիճահարույց էսքիզը:

«Ես քանդակագործ չեմ, բայց երեկ մի քանի հեռուստաընկերություններով նայեցի, նորմալ էր: Որպես պատմաբան եմ ասում՝ Արամ Մանուկյանի կերպարի մեջ են եռագույն դրոշը, ընտրված վայրը: Նորմալ է»,- ասաց նա:

Իսկ ի՞նչ կարծիքի է այն մասին, որ ներկայացված տարբերակում դրոշն ընկած է գետնին, հետաքրքրվեցին լրագրողները:

«Ի՞նչ է նշանակում դրոշը գետնին ընկած: Դրոշը գետնին ընկած չէ»,- նշեց Շարմազանովը:

Անդրադառնալով ՀՀ արդարադատության նախարար Դավիթ Հարությունյանի այն հայտարարությանը, որ կառավարության նիստերը դռնփակ անցկացնելը ժողովրդավարական քայլ է, ԱԺ փոխնախագահը շեշտեց՝ ինքը ևս այդ կարծիքին է:

«Այստեղ ես պարոն Հարությունյանի հետ համակարծիք եմ»,- ասաց նա:

Իսկ ինչո՞ւ ժողովրդավար այդ քայլին իշխանությունը որոշեց գնել միայն հիմա՝ ապրիլին նախընթաց: «Լավ է ուշ, քան երբեք: Դավիթ Հարությունյանը ներկայացրել է բոլոր հիմնավորումները, նա այնքան սպառիչ է խոսել, որ իմ հավելյալ մեկնաբանության կարիքը չկա: Ինձ մնում է միանալ նրա պնդումներին»,- ամփոփեց հանրապետական գործիչը: