Ձեր վստահելի աղբյուրը

«Միջհամայնքային միավորումների մասին օրենքի նախագիծն ունի բազմաթիվ հակասություններ Սահմանադրության հետ»,- Միջհամայնքային միավորումների մասին և կից ներկայացված օրենքների նախագծերի փաթեթի քննարկման ժամանակ ասաց «Ելք» խմբակցության պատգամավոր Արտակ Զեյնալյանը։

Նրա խոսքով՝  չորս տարի հետո չէ, որ այս խնդիրը պետք է լուծվի. «Եկեք հիմա լուծենք այս խնդիրը, որպեսզի չորս տարի մարդկանց իրավունքները չխախտվի։ Օրինագծում ասվում է, որ համայնքների միավորումը նոր համայնք չէ, ՏԻՄ չէ, եթե այսպես է, ԱԺ-ն իրավունք չունի լիազորելու պետական մարմին չհանդիսացող կառույցին նորմատիվ իրավական ակտեր ընդունել»։

Նույն խմբակցության պատգամավոր Մանե Թանդիլյանն էլ անդրադարձավ միջհամայնքային միավորումներում կանանց ներգրավվածության խնդրին։

«Համայնքներում մենք ունենք տղամարդկանց ակումբ, առանց այդ էլ կանանց ներկայացվածությունը բավական ցածր է: Խոշորացման արդյունքում թե ավագանի, թե համայնքի ղեկավար կանանց թիվը կտրուկ նվազել է: Պետք է ամրագրել, որ եթե տվյալ համայնքի ղեկավարը տղամարդ է, ապա միջհամայնքային միավորումներում հաջորդ մասնակից անդամը պետք է լինի կին»,- նշեց նա։



«Ծառուկյան» խմբակցության պատգամավոր Նաիրա Զոհրաբյանն էլ ամբիոնից կոչ արեց չդնել քվեարկության մի նախագիծ, որը, նրա խոսքով, լի է հակասություններով։

«Ինչու, եթե դեռ չենք ավարտել համայնքների խոշորացման փուլերը, եթե գոնե մեկ խոշորացման հաջողված պատմություն չունենք, դուք ինքներդ նշեցիք, որ դեռ վաղ է խոսել խոշորացման երկրորդ փուլի մասին, հիմա բերում ենք նման նախագիծ: Դուք փորձում եք հիմա էլ համայնքներում ստեղծել ՀՀԿ-ի քաղաքական մոնոպոլիա: Ձեր սիրած մեծամասնությունը ուզում եք տեղափոխել նաև համայնքային հարթակ»,-հայտարարեց Զոհրաբյանը:

Նա հայտնեց, որ այս երկու օրերին զանգեր է ստանում համայնքապետերից, ովքեր նշում են, որ այս նախագիծը կործանելու է համայնքները, որոնք խոշորացման արդյունքում դեռ չեն կարողանում գալ կայուն վիճակի:

«Եթե այս նախագիծը դրվի քվեարկության, մեր դաշինքը, բնականաբար, քվեարկելու է դեմ»,- հավելեց նա։