Ձեր վստահելի աղբյուրը

Կառավարության հետ հարցուպատասխանի ընթացքում ԱԺ պատգամավոր Արման Սաղաթելյանը շնորհակալություն հայտնեց առողջապահության և կրթության նախարարներին՝ դպրոցական պայուսակների քաշի վերաբերյալ իր կողմից բարձրացված հարցին լուծում տալու նպատակով իրականցվող աշխատանքների համար:

«Խոսքս աշակերտների պայուսակների քաշի նորմատիվ ակտի մասին է: Հույս ունեմ, որ կհետևեն քայլեր այդ նորմատիվների պահպանման ուղղությամբ, որպեսզի հասկանանք՝ ինչպես պահպանենք այդ նորմը: Կլինի ուսումնական պրոցեսի վերանայում, դասագրքերի հետ կապված հարցեր: Բազմաթիվ ծնողներ, այդ թվում՝ ես  հետևում ենք այս խնդրի լուծմանն ու սպասում ենք նոր քայլերի այդ ուղղությամբ»,-հավելեց Սաղաթելյանը: 

Հիշեցնենք, որ դեռևս անցյալ տարի կառավարության հետ հարցուպատասխանի ժամանակ Սաղաթելյանը պատմել էր, որ կշռել է իր և իր ընկերների երեխաների պայուսակներն ու պարզել է, որ դրանք 5 կիլոգրամից ավելի են կշռում։ Պատգամավորը կառավարության ուշադրությունն էր հրավիրել խնդրի վրա և առաջարկել համատեղ ուժերով լուծել երեխաների առողջությանը սպառնացող խնդիրը։

Որպես խնդիր լուծում՝ Արման Սաղաթելյանն առաջարկել էր անցում կատարել էլեկտրոնային գրքերի ու պլանշետների։

Պատգամավորի ելույթից հետո  Առողջապահության նախարար Լևոն Ալթունյանը հրամանով սահմանվել է հանրակրթական ծրագրեր իրականացնող ուսումնական հաստատություններին ներկայացվող պահանջները: Ըստ փաստաթղթի, դպրոց տարվող դասագրքերի և գրենական պիտույքների հավաքածուի քաշը չպետք է գերազանցի 1-ին, 2-րդ դասարանների սովորողների համար 1,5 կգ, 3-րդ, 4-րդ դասարանների սովորողների համար՝ 2 կգ, 5-6-րդ դասարանների սովորողների համար՝ 2,5 կգ, 7-8-րդ դասարանների սովորողների համար՝ 3,5 կգ, 9-12-րդ դասարանների սովորողների համար՝ 4 կգ:

Որոշումը նաև կարգավորում է հաստատության սանիտարական վիճակին և պահպանմանը ներկայացվող պահանջները, որոնց համաձայն դպրոցները պետք է մաքուր լինեն, ամեն օր պետք է իրականացվի ընթացիկ խոնավ մաքրում, իսկ ամիսը մեկ անգամ կատարվի շենքերի հիմնական մաքրում: