Ձեր վստահելի աղբյուրը

Կառավարության ներկայացրած Հանրային խորհրդի մասին օրենքի նախագիծն այսօր ԱԺ արտահերթ նիստի առաջին ընթերցմամբ քննարկվող հարցերից է։

Հիմնական զեկուցող Արդարադատության նախարարի առաջին տեղակալ Արթուր Հովահաննիսյանն իր ելույթում նշեց, որ ՀԽ խնդիրն է քաղաքականության մշակման և իրականացման գործում հասարակության տարբեր շերտերի շահերի ներկայացումը:

Ի տարբերություն գործող Հանրային խորհրդի, որը կազմված է 36 անդամից, նախագծով նախատեսվում է, որ խորհուրդը բաղկացած կլինի 45 անդամից։

«Խորհրդի անդամ կարող է լինել 25 տարին լրացած անձը, պետությանը ծառայություններ մատուցած, հանրային կամ իր մասնագիտական ոլորտում հեղինակություն վայելող անձը։ Նախատեսել ենք, որ 12 ոլորտային հանձնաժողովների փոխարեն կլինեն 15-ը։ Արտահերթ նիստեր կանցկացվեն ոչ թե անդամների երկու երրորդի, այլ մեկ քառորդի պահանջով։ Իսկ նիստերը պետք է անցկացվեն ոչ պակաս, քանի երկու ամիսը մեկ անգամ, դրանք կլինեն դռնբաց։ ՀԽ առաջին 15 անդամներին կընտրի կառավարությունը»,- մանրամասնեց փոխնախարարը։

Նա նշեց, որ հանրապետության վարչապետը ՀԽ 45 անդամների շարքից կներկայացնի կառավարության նշանակմանը ՀԽ նախագահին։