Ձեր վստահելի աղբյուրը

«Նախատեսվում է 2018 թվականի ապրիլի 1-ից մինչև հոկտեմբերի 1-ը ժամանակավորապես արգելել աջակողմյան ղեկային տեղաբաշխմամբ տրանսպորտային միջոցների բացթողում՝ ներքին սպառման համար մաքսային ընթացակարգով, ինչպես նաև ֆիզիկական անձանց անձնական օգտագործման տրանսպորտային միջոցներն ազատ շրջանառության համար բաց թողնելու նպատակով դրանց ներմուծումը ՀՀ»,- ԱԺ արտահերթ նիստում Աջակողմյան ղեկային տեղաբաշխմամբ տրանսպորտային միջոցների ներմուծումը ժամանակավոր արգելելու մասին օրենքի նախագծի քննարկման ժամանակ ներկայացրեց  ՀՀ տրանսպորտի, կապի և տեղեկատվական տեխնոլոգիաների փոխնախարար Գագիկ Գրիգորյանը։

Հանրապետական խմբակցության պատգամավոր Շուշան Սարդարյանը ասաց, որ մինչ այս արգելքի հիմնական պարզաբանումն այն է, որ երթևեկության անվտանգության ապահովման համար է արվում այս որոշումը։

«Միևնույն ժամանակ, հասարակական սեկտորը իր տեսակետն էր առաջ քաշում՝ բերոլով հակափաստարկներ, որ արգելքը չի բխում անվտանգության խնդիրներից: Արդյոք այս որոշման հիմքում որևէ ուսումնասիրություն, վիճակագրական բազա ուսումանսիրվե՞լ է ոստիկանության, ապահովագրական կազմակերպությունների կողմից դժբախտ պատահարների մասով»,-հարցրեց Սարդարյանը։

Փոխնախարար պատասխանեց, որ վիճակագրական տվյալների հետ կապված հստակ տեղեկություններ կան, թե քանի աջակողմյան ղեկային տրանսպորտային միջոց կա, և նրանց կողմից իրականացված խախտումները նույնպես հրապարակված են:

«Խնդիրը սրա մեջ  չէ, խնդիրն այն է, որ երկիրն ընտրել է աջակողմյան երթևեկություն, ինչը հստակ գրված է օրենքում։ Բոլոր նշանները, գծանշումները և կազմակերպումն ու կառավարումն են իրականացվում դրան համապատասխան: Աջ ղեկով մեքենաներն այն երկրների համար է, որտեղ գործում է ձախակողմյան երթևեկություն»,-ասաց զեկուցողը։

Պատգամավորի մեկ այլ հարցին, թե ինչու է ընտրվել  հենց ապրիլի 1-ից մինչև հոկտեմբերի 1-ն ընկած ժամանակահատվածը, Գագիկ Գրիգորյանը հայտնեց, որ նախաձեռնությունը դեկտեմբերից է սկսել. «90 օր ժամանակ է տրվել այն մարդկանց, ընկերությունների համար, որոնք կարող էին պատվիրած լինեն մեքենաներ՝ նրանց համար ֆինանսական դժվարություններ չառաջացնելու համար»։

ՀՀ ԱԺ «Ելք» խմբակցության պատգամավոր Արտակ Զեյնալյանն էլ իր ելույթում հայտարարեց, որ աջակողմյան ղեկով ձեռք բերված մեքենան տասը տարի ավելի թարմ է, և այդ մեքենան և էկոլոգիապես է մաքուր, և տեխնիկապես ավելի նոր է, քան նույն գնով ձեքռ բերված ձախակողմյանը։

Պատգամավորն առաջարկեց, որ եթե անվտանգություն ապահովելն է անկեղծ նպատակը, ապա աջակողմյան մեքենաները կարելի է հագեցնել ձախ հայելու վրա տեսախցիկ է։

«Սրա ետևում ինչ-որ տնտեսական բան կա, թաքնված մի բան կա, գուցե լավ նպատակով, բայց գաղտնի պահվող»,- հավելեց պատգամավորը։