«Զվարթնոց»-ի հին շենքին հիմնականում հարդարման աշխատանքներ են պետք. Գրիգոր Ազիզյան
Քաղաքացիական ավիացիայի գլխավոր վարչությունը օրերս e-draft.am կայքում քննարկման է ներկայացրել «Զվարթնոց» միջազգային և Գյումրու «Շիրակ» օդանավակայանների կոնցեսիոների կողմից ներկայացված 2018-2022 թվականների Մաստեր Պլանի նախագիծը: Ըստ այս նախագծի՝ նախատեսվում են օդանավակայանում մի շարք բարելավման փոփոխություններ: Առանձին կետով մատնանշվում է «Զվարթնոց» օդանավակայանի հին շենքի քանդման մասին:
Փետրվարի 8-ին լրագրողների հետ հանդիպմանը ճարտարապետ, Օդանավակայանի հին մասնաշենքի համահեղինակ Արթուր Թարխանյանի դուստրը Անահիտ Թարխանյանը նշեց, որ կոնցեսիոները օդանավակայանի փոփոխությունների խնդրով բազմիցս դիմել է Կառավարությանը: «Ամեն անգամ հարց է բարձրացվում քանդել գոյություն ունեցող, նախկինում կառուցված շենքը, դա՝ այն պայմաններում, երբ շենքը կոնցեսիոն պայմանագրով հանձնված է իր կառավարմանը: Կոնցեսիայի հիմնական իմաստն էր՝ բարելավել օդանավակայանը, դրա փոխարեն տեսնում ենք լքված մի շենք, որտեղ երկար տարիներ ներդրումներ չեն արվել, ու անընդհատ այն քանդելու հարց է բարձրացվում»,- ասաց նա:
Թարխանյանը նշեց, որ ճարտարապետների միությունը, հանրային խորհուրդը, արվեստագետները, նաև հայտնի ճարտարապետներ՝ Ռուսաստանից, Գերմանիայից, կտրականապես դեմ են արտահայտվել այդ շենքի քանդմանը: Ճարտարապետի գնահատմամբ՝ այդ շենքը դիտարկվում է որպես լավագույն օբյեկտներից մեկը, որը ներկայացնում է 50-ական թվականների մոդեռնիզմը ճարտարապետության մեջ, ուստի այդպիսի բարբարոսություն դժվար է հասկանալ և ընկալել:
Հայաստանի Ճարտարապետների միության նախագահ Մկրտիչ Մինասյանի խոսքով՝ դժվար է անընդհատ պայքարել: «Երբ ուրիշ տեղերում հայկական հուշարձան են ոչնչացնում, հեշտ է, մենք այստեղից պարզապես պարսավանքի ենք ենթարկում այդ մարդկանց, բայց տարօրինակ է, երբ մեր երկրում է դա կատարվում: Օդանավակայանը, նրա նման մյուս մոդեռնիստական կառույցները, լինի դա Երիտասարդական պալատը, Ծածկած շուկան, թե Սևան հյուրանոցը, բոլորը վերացան, բայց չէ՞ որ քաղաքը այդպես է. իրավունք է ունենում հմայիչ կոչվելու հենց նման կառույցներով և դրանք պահելով»,- ասաց նա:
Մինասյանը նշեց, որ կան Զվարթնոցի հին շենքը պահելու բազմաթիվ տարբերակներ, առաջարկներ են ներկայացվել, անգամ դիտարկվել է շենքի ֆունկցիան փոխելու հարցը: Միության նախագահն իբրև օրինակ նշեց այդ հատվածում Հայաստանի փոքր հուշարձանների մակետները տեղադրելու առաջարկը: Նա ասաց, որ աշխարհում նման բաներ անում են: «Եթե նման բաներ անում են լքված կառամատույցների ժամանակակից թանգարաններ ստեղծելու, ապա սա էլ է տարբերակ: Մի՞թե մենք այդքան հարուստ ենք, որ կարող ենք դա կոտրել ու նոր բան ստեղծել: Ինչ-որ բան կստեղծվի, այո, բայց չէ որ մենք դա ունենք, պահել է պետք: Հայաստանը պետք է հարստացվի նաև այդ հին կառույցներով, ո՞նց կարելի է դնել ու քանդել ամեն ինչ»,- ասաց նա:
«Հայնախագիծ» ինստիտուտի տնօրեն, Հանրային խորհրդի քաղաքաշինության ենթահանձնաժողովի նախագահ Գրիգոր Ազիզյանն ընդգծեց, որ եթե ինչ-որ մի բան չեն շահագործում, այն կամաց-կամաց քանդվում է: Նրա խոսքով՝ այսօր եթե մտնեն օդանավակայանի հին շենք, կտեսնեն մի պատկեր, որ նման է Ստալինգրադյան ճակատամարտին՝ ամեն ինչ պոկված է, քանդված է, ջարդված է: Այդ պատկերի «փոփոխումն», ըստ Ազիզյանի, ծախս է պահանջում:
«Եթե մենք հիշենք կոնցեսիոն պայմանագիրը, որի մասին խոսում ենք, ապա նա պարտավոր էր 30 տարի անց այդ շենքը վերադարձնել բարելավված վիճակում: Այնտեղ ծախս պետք է կատարեր անընդհատ, սակայն որևէ ծախս չի արվել»,- ասաց նա: Ազիզյանն ասաց, որ իրենք ժամանակակից ստանդարտներով ու նորմերով հաշվել են այդ շենքի կրողունակությունը և ուրախությամբ արձանագրել, որ իր ձևի շնորհիվ շենքը շատ բարձր կրողունակություն ունի:
Հանրային խորհրդի ներկայացուցչի խոսքով՝ շենքի առաջին հարկի սյուների փոքրիկ ուժեղացումով բոլոր հարցերը լուծվում են, այսինքն՝ ծախսերը պետք են միայն հարդարման աշխատանքների համար, բայց դրանից առաջ պետք է հասկանալ՝ ինչ են ուզում կառուցել այնտեղ, ինչու են ուզում քանդել այն:
Լրահոս
Տեսանյութեր
ՈւՂԻՂ. Տրանսպորտը թանկացնում են նախկինների մերժած հաշվարկով. Պիպոյանը փաստաթղթեր է հրապարակում
