Ձեր վստահելի աղբյուրը

Դատական տուգանքը կարող է արդյունավետ ծառայել դատական նիստի բնականոն գործընթացն ապահովելու համար: ԱԺ-ում լրագրողների հետ զրույցում այսօր նման համոզմունք հայտնեց Արդարադատության նախարարի առաջին տեղակալ Արթուր Հովահաննիսյանը:

«Երբ ինչ-որ հարցի քաղաքականությունն ես մշակում, այնպես չէ, որ պետք է զուտ սրտով շարժվես: Ավելի խիստ պատժամիջոցներ էին մտածում, որին անձամբ ես էլ դեմ էի: Օրինակ,  կան երկրներ, որտեղ կալանք պատժատեսակը նույնպես կիրառում է դատարանը՝ իր իսկ նիստի կարգազանց մասնակցի կամ փաստաբանի նկատմամբ: Դա ընդունելի չէր, բայց այդ տուգանք-սանկցիան մինչև օրս էլ կա Սահմանադրական դատարանի մասին օրենքով, երբ փաստաբանը կամ դատավարության այլ կողմ կարող է  ՍԴ-ի սահմանված կարգը:

Կիրառվում է սանկցիան, թե չի կիրառվում, դա այլ հարց է: Հետևաբար ասել, որ դատական սանկցիաները մենք նախատեսում ենք զուտ փաստաբանների համար, տեղին չէ, որովհետև նույն կերպ մենք դա անում ենք բոլոր մասնակիցների՝ նաև դատախազների համար: Դատախազը ևս, այո, պարտավոր է դատական նիստի ժամանակ պահպանել կարգուկանոնը: Դատավորը կշարաշահի իր լիազորությունները, փաստաբանի նկատմամբ անհիմն սանկցիաներ կիրրառի, առավելագույն խստությամբ կպատժվի»,- հավաստիացրեց Արթուր Հովհաննիսյանը:

Արդարադատության նախարարի առաջին տեղակալը նաև նկատեց, որ եթե քրեական գործով դատական նիստ է, բայց փաստաբանը մի քանի անգամ չի մասնակցում, դատարանը նիստի բնականոն ընթացքը պահպանելու պարտականություն ունի: Ուրեմն ինչ միջոց պետք է ձեռնարկի դատարանը, որ ամեն անգամ ՔԿՀ-ից երկար ճանապարհ չկտրեն, ամբաստանյալին բերեն, իսկ տուժողները չներկայանան:

«Ինչ միջոց ունի դատավորն այսօր՝ նիստի բնականոն ընթացքը ապահովելու համար՝ ոչ մի»,- ասաց նա՝ միաժամանակ վստահություն հայտնելով, որ լիովին հնարավոր է վստահորդի շահերը պաշտպանել առանց խախտելու դատավարական կանոնները, և բարեխիղճ փաստաբանի համար սանկցիաները վտանգ բացարձակապես չեն ներկայացնում: