Ձեր վստահելի աղբյուրը

«Այսօր կենցաղային ու հատուկ նշանակության հրավառության միջոցները բավականին քիչ են իրարից տարբերվում, այնքան տեսականի կա, որ երբեմն նույնիսկ դժվար է սերտիֆիկացիոն որևէ փաստաթուղթ գտնել և հասկանալ՝ որը որն է»,- այսօր ԱԺ արտահերթ նիստում «Տեղական տուրքերի և վճարների մասին» ՀՀ օրենքում լրացումներ կատարելու մասին և կից ներկայացված օրենքի նախագծերի քննարկման ժամանակ հայտարարեց Հանրապետական խմբակցության պատգամավոր Արման Սաղաթելյանը։

Նշենք, որ այս փաթեթում ներառված է նաև հրավառություն կազմակերպելու կանոնների, պահանջների ու տուրքերի մասին դրույթը։

Պատգամավորը Երևանի փոխքաղաքապետ Կամո Արեյանից հետաքրքրվեց. «Տուրքը ենթադրու՞մ է արդյոք, որ տուրք վճարելու և այդ թույլտվությունը ստանալու պարագայում հակահրդեհային և այլ բնույթի պատասխանատվությունը վերցնում է ՏԻՄ մարմինն իր վրա։ Այսինքն՝ սա որոշակի ծառայություն ենթադրում է տեղական իշխանության կողմից, թե բացառապես ուղղված է միայն թույլատրման և գումարի գանձման գործընթացին»։

Արեյանը պատասխանեց, որ այն վճարվում է որպես տեղական տուրք՝ այդ գործունեությունն իրականացնելու թույլտվությունը ստանալու համար։

«Տեխնիկական և հատուկ նշանակության  հրավառության նյութերը, բաղադրիչը, սարքավորումները, պահեստարանները, այս ամենի նկատմամբ կանոնները սահմանել է ՀՀ կառավարությունը, առաջին որոշումը, որը կոչվում է «Հրավառության օգտագործման նյութերի անվտանգության կանոնների սահմանում», երկրորդ փաստաթուղթը ՀՀ ոստիկանապետի հրամանն է, որով սահմանված են հրավառության նյութերի օգտագործման կանոնները, ժամերը, ինչպես նաև հանրային միջոցառումների ժամանակ դրանց կիրառման կանոնները։ Հաջորդը՝ ԱԻ նախարարի հրամանն է՝ հրդեհային անվտանգության կանոնների տեսանկյունից, որտեղ սահմանված են նույնիսկ մանրածախ վաճառքի պայմանները։ Մյուսը կառավարության 2015 թվականի որոշումն է, որտեղ սահմանվել է հրավառությունների թույլատրելի ժամերից դուրս բացառությունների սահմանները»,- մանրամասնեց փոխքաղաքապետը։

Սաղաթելյանն արձագանքեց, որ շատ հաճախ մասնավոր կերպով իրականացվող հասարակությանն անհանգստացնող, աղմուկ հանող, հակահրդեհային տեսանկյունից կասկածելի հրավառությունների կազմակերպիչների համար շատ դժվար է արագ որտեղից է այն տեղի ունեցել, ով է դրա կազմակերպիչը և ուր է այն։

«Անձամբ ես մի քանի անգամ առիթ եմ ունեցել զուտ ծանոթացման և զրույցի նպատակով գտնել մարդկանց, ովքեր ժամը 2-ին և ոչ այնքան հեռու իրականացրել են հրավառություն և չեմ կարողացել դա անել յոթ րոպեի տարբերությամբ։ Այսինքն՝ շատ հաճախ մարտավարությունը նման անհատների շատ նման է այդ մոբիլ ահաբեկչական խմբերին, որ ականանետը դնում են փողոցի մեջտեղում կրակում են, յոթ րոպե հետո չկան։ Ո՞վ էր, ինչի՞ արեցին այդ սալյուտը բնակելի թաղամասում, ու՞ր գնացին, ո՞նց գտնենք իրենց։ Սա  լուրջ խնդիր է»,- նշեց Սաղաթելյանը։

Արեյանը ընդունեց պատգամավորի մտահոգությունները և նշեց, որ սահմանված չեն չափորոշիչներ...հիմա առաջարկում են, որտեղ է սկսվում և ավարտվում տեխնիկական և հատուկ նշանակության հրավառությունների սահմանը. «Նույնիսկ վաճառքի սրահներում այդ սահմանազատումը չկա»։