Ձեր վստահելի աղբյուրը

«Մեդիալաբ» կայքի խմբագրին հնչեցված սպառնալիքների հարցում հրապարակայնությունն ապահովվել է: Փետրվարի 9-ին լրագրողների հետ հանդիպմանը այս մասին նշեց ՀՀ գլխավոր դատախազ Արթուր Դավթյանը: Նա նշեց, որ հաղորդում ստանալուն պես այն ուղարկել են ոստիկանություն՝ նյութեր նախապատրաստելու:

Նյութերի նախապատրաստման փուլում պարզվել է այն անձը, ով համապատասխան գրառումները կատարել է խմբագրի նկատմամբ, անձը հրավիրվել է ոստիկանություն, նրանից վերցվել է բացատրություն, որի արդյունքում արդեն նյութերում քրեական գործ հարուցելու համար հիմքերը բավարար համարելով՝ հսկողություն իրականացնող դատախազը վերցրել և այդ փաստով հարուցել է քրեական գործ: Այն ուղարկվել է քննչական կոմիտե՝ նախաքննություն իրականացնելու համար:

Գլխավոր դատախազի խոսքով՝ քննիչը, ստանալով այս քրեական գործը, այն վարույթ կընդունի, կհրավիրի հաղորդում տված անձին, նրան կտա համապատասխան՝ տուժողի դատարավարական կարգավիճակ և կիրականացվի օբյեկտիվ քննություն՝ համապատասխան օբյեկտիվ գնահատականով: «Այսինքն՝ մենք սրանով արդյունք ունենք. ունենք անձ, ով համապատասխան հաղորդագրությունների հեղինակն է, մեզ մնում է միայն պատշաճ քննության արդյունքում նրա արարքին տալ իրավաչափ քրեաիրավական գնահատական»,- ասաց նա:

Արձագանքելով հարցին՝ արդյոք 10 օրը բավականաչափ ժամանակ չէր՝ արդեն իսկ այդ գնահատականը տալու համար, Դավթյանը նշեց, որ 10 օր քրեադատավարական օրենքը նախատեսել է միայն նյութերի նախապատրաստման համար, սակայն դա այն ժամկետը չէ, որ ասեն՝ «անգործության են մատնվել», առավել ևս՝ որ ունեն արդյունք:

Գլխավոր դատախազին խնդրեցին պարզաբանել՝ ի՞նչ քայլեր են արվել բյուջեն թալանող համայնքապետերի մասին ՀՀ նախագահ Սերժ Սարգսյանի հայտարարության հետքերով: Դավթյանը արձագանքեց, որ այս առումով Գլխավոր դատախազության դիրքորոշումը հրապարակված է:

«Այո, մենք քննարկել ենք այդ հաղորդումը, քննարկման արդյունքում տվել ենք պատշաճ պարզաբանում, որ ներկայացված համապատասխան նյութը իր մեջ հանցագործության ախտանիշներ չի պարունակում, այսինքն՝ դա չի կարող դիտվել որպես հանցագործության մասին համապատասխան հաղորդում, իսկ թե դրանք ինչ բնույթի գնահատականներ են, կարծում եմ՝ իրականության մեջ բոլորին հայտնի է»,- ասաց նա:

Դավթյանը նշեց, որ Գլխավոր դատախազությունը հրապարակել է որոշակի ժամանակահատվածում նույն համայնքապետերի նկատմամբ իրականացված քրեական հետապնդումները, այսինքն՝ ոչ ոք չի կարող ասել, որ այդ նույն ժամանակահատվածում համայնքապետերի նկատմամբ անհրաժեշտ քրեական հետապնդում չի իրականացվել: