Ձեր վստահելի աղբյուրը

ՀՀ նախագահի թեկնածու Արմեն Սարգսյանի հետ հանդիպման հենց սկզբում «Ելք»-ը հստակ արձանագրել է, որ նախագահի սեփական թեկնածու ունի։ Լրագրողների հետ զրույցում  այսօր այս մասին ասաց «Ելք» խմբակցության ղեկավար Նիկոլ Փաշինյանը։

«Ասացինք, որ ճիշտ է, այս պահին դե յուրե թեկնածու չէ, բայց պարոն Սարգսյանն ասաց, որ ինքն էլ դե յուրե թեկնածու չէ, պետք է մտածի։ Մենք ասացինք, որ մեր խմբակցության պատկերացրած նախագահի թեկնածուն Արտակ Զեյնալյանն է։ Ընդհանուր քննարկում տեղի ունեցավ։ Նախ, բնականաբար, իր տեսլականի շուրջ է եղել խոսակցությունը։ Բացի այս՝ մենք իր տեսակետն ենք հարցրել, թե ինչպես է վերաբերում Սերժ Սարգսյանի այն հայտարարությունը, որ վարչապետի պաշտոնին չի հավակնելու, բայց գործընթացները գնում են այլ ուղղությամբ։ Ընդգծել ենք, որ դա ներքաղաքական իրավիճակը սրելու շատ լուրջ պոտենցիալ ունեցող հարց է։

Հետաքրքրվել ենք նրա տեսակետով, թե ինչպես է վերաբերում այն բանին, որ նախագահական նստավայրն, ըստ էության, պատրաստվում են խլել նախագահից։ Հարցրել ենք, թե ինչպես է վերաբերում ներման համակարգի փոփոխությանը։ Սահմանադրությամբ ներման իրավունքը հստակ նախագահին է վերապահվում, բայց հիմա դա դե ֆակտո դառնում է վարչապետի գործառույթ։ Ընտրակաշառքների շուրջ խնդիրներով ենք հետաքրքրվել՝ իր տեղեկացվածության մակարդակի, իր գնահատականների վերաբերյալ»,- ասաց Փաշինյանը։

Նա նաև տեղեկացրեց, որ Արմեն Սարգսյանից փորձել են իմանալ վերջինիս դիրքորոշումը  Մարտի 1-ի դեպքերի վերաբերյալ, բարձրացրել են նաև քաղբանտարկյալների և իր՝ Արմեն Սարգսյանի քաղաքացիությանը վերաբերող հարցեր։

«Ես կոռեկտ չեմ համարում իր պատասխանները հրապարակել, որովհետև կարծում եմ, որ այս հարցերի շուրջ հրապարակային քննարկումներ կլինեն։ Մեր հանդիպման նպատակը չի եղել գոհ կամ դժգոհ լինելը։ Մենք նրա պատասխաններն ընդունել ենք ի գիտություն»,- նշեց «Ելք»-ի ներկայացուցիչը։

Նիկոլ Փաշինյանը տեղեկացրեց, որ խոսվել է հետագայում հանդիպումներ ունենալու և քննարկումներ կազմակերպելու մասին։

Հարցին՝ Արմեն Սարգսյանի մոտեցումները տարբերվո՞ւմ են իշխող կուսակցության մոտեցումներից, պատգամավորը նկատեց. «Արմեն Սարգսյանն իշխանության թիմի մեջ է, իհարկե՝ սահմանադրական նոր գործառույթներով։ Նա, եթե համաձայնվի լինել նախագահի թեկնածու, նշանակում է՝ համաձայնում է լինել այդ դերակատարման մեջ»,- ասաց Փաշինյանը։

Անդրադառնալով Արմեն Սարգսյանի քաղաքացիության թեմային՝ «Ելք» խմբակցության պատգամավորը նկատեց, որ ստուգելի է՝ արդյոք անձն ունի քաղաքացիության համապատասխան ցենզ, թե ոչ։

«Եթե նա նախագահի թեկնածու է առաջադրվում, պետք է հոգ տանի, որպեսզի այդ ամենը ոչ միայն բանավոր խոսքի վրա հիմնված լինի, այլև փաստաթղթերով արձանագրվի»,- ասաց նա։