Ձեր վստահելի աղբյուրը

66 կողմ, 18 դեմ, 5 ձեռնպահ արդյունքներով այսօր ԱԺ-ն առաջին ընթերցմամբ ընդունեց կառավարության կողմից ներկայացված «Ներման մասին»  և կից ներկայացված օրինագծերի փաթեթը:

Մինչ քվեարկությունը վարման կարգով «Ելք» խմբակցության ղեկավար Նիկոլ Փաշինյանը հայտարարեց, որ երեկ այս օրինագծի քննարկման ժամանակ էլ հայտարարել է, որ «Հանրապետականը դե ֆակտո որոշում ունի վարչապետի պաշտոնում Սերժ Սարգսյանին առաջադրել, և դա ըստ էության չհերքվեց: Ես հիմա կարևոր եմ համարում, սա արձանագրելը»:

Խմբակցության պատգամավոր Արտակ Զեյնալյանն ասաց, որ ներման շնորհումը Սահմանադրությամբ տրված է հանրապետության նախագահին:

«Այս օրինագծով ըստ էության իմաստազրկվում է այս ինստիտուտը, և ձևական բնույթ են կրում նախագահի լիազորությունները: Ուստի «Ելք» խմբակցությունը քննարկել է  ու որոշել է դեմ քվեարկել այս նախագծին»,-ասաց նա:

Նույն խմբակցությունից Արարատ Միրզոյանը կարծիք հայտնեց, որ վարչապետի լիազորությունների նման ընդլայնումն աղետալի է լինելու Հայաստանի համար ու որևէ կերպ համատեղելի չէ ժողովրդավարության հետ:

«Ծառուկյան» խմբակցությունից Վահե Էնֆիաջյանը հայտարարեց, որ նախորդող քննարկումներում հայտնել են իրենց դիրքորոշումը՝ օրինագիծը սահմանադրականության հետ կապված բավականին մեծ խնդիրներ ունի:

««Ծառուկյան» խմբակցությունը քննարկել և որոշել է, որ քվեարկում է  ազատ»,-ասաց պատգամավորը:

Հիշեցնենք, որ այսօրվա նիստին գրանցված է 96 պատգամավոր, չի քվեարկել 7-ը: