Արմեն Սարգսյան. Նախագահ ընտրվելու դեպքում կցանկանամ միևնույն ճանապարհով քայլել ժողովրդի հետ միասին

Քաղաքական 19:31 09/02/2018 Հայաստան

Արմեն Սարգսյան. Նախագահ ընտրվելու դեպքում կցանկանամ միևնույն ճանապարհով քայլել ժողովրդի հետ միասին

ՀՀԿ կողմից ՀՀ նախագահի թեկնածու առաջարկված Արմեն Սարգսյանն այսօր հանդիպում է ունեցել Գավառի պետական համալսարանի վարչական, պրոֆեսորադասախոսական անձնակազմի և ուսանողական խորհրդի հետ:

Թեկնածուի գրասենյակից մանրամասնում են, որ համալսարանի ռեկտոր Ռուզաննա Հակոբյանը ողջունել է Արմեն Սարգսյանին, հակիրճ ներկայացրել նրա կենսագրությունն ու անցած ուղին, և կարևորել ԳՊՀ կատարած այցը:

«Ողջունելի է ՀՀ 3-րդ նախագահի իմաստուն որոշումը՝ Արմեն Սարգսյանին հանրապետության նախագահի պաշտոնում առաջադրելու վերաբերյալ: Արմեն Սարգսյանը լայնախոհ գիտնական է, իսկական մտավորական, բազմափորձ դիվանագետ, անբիծ քաղաքական գործիչ, հմուտ գործարար»,- նշել է ռեկտորը:

Արմեն Սարգսյանը շնորհակալություն է հայտնել ջերմ ու անմիջական ընդունելության համար և պատասխանել ուսանողների հարցերին, որոնք հիմնականում վերաբերում էին Հայաստանի Հանրապետության արտաքին քաղաքականության առաջնահերթություններին, Հայաստան-ԵԱՏՄ- ԵՄ հարաբերություններին, կրթության խնդիրներին, երիտասարդության հիմնահարցերին:

Արմեն Սարգսյանը հանդիպման ընթացքում ներկայացրել է Հայաստանի ապագայի իր տեսլականը, կարևորել տեղեկատվական տեխնոլոգիաների զարգացումը, կրթական համակարգի բարեփոխումը, երկրի երկարաժամկետ զարգացման ռազմավարական ծրագրի մշակումը:

«Նախագահ ընտրվելու դեպքում կցանկանամ միևնույն ճանապարհով քայլել ժողովրդի հետ միասին»,-ասեկ է թեկնածուն:

Արմեն Սարգսյանը եղել է նաև Գավառի պետական համալսարանի պատմագիտական–հնագիտական թանգարանում և ծանոթացել է պատմամշակութային արժեք ներկայացնող ցուցանմուշներին:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: