Ձեր վստահելի աղբյուրը

«Տեղեկատվության մատչելիության ոլորտը այն բացառիկ ոլորտներից է, որով Հայաստանը հանդես է գալիս առաջատար դիրքերից, հիմա այնպիսի տպավորություն է, որ բոլոր ձեռքբերումներից ուզում ենք կամաց-կամաց հրաժարվել, սա շատ վատ չափանիշ է»,-հայտարարեց  Ինֆորմացիայի ազատության կենտրոնի հիմնադիր նախագահ  Շուշան Դոյդոյանը՝ «Մեդիա կենտրոն»-ում անցկացված «ՀՀ կառավարության դռնփակ նիստեր. ժողովրդավարության հետքա՞յլ, թե՞ արդյունավետ աշխատելաոճ» թեմայով քննարկման ժամանակ:

Նա կարծիք հայտնեց, որ փակելով լրագրողների մուտքը կառավարության նիստերի դահլիճ՝ ոտնահարվում է լրագրողների՝ ուղղակի տեղեկատվություն ստանալու իրավունքը, ինչպես նաև հանրության տեղեկատվություն ստանալու իրավունքը: Սա նշանակում է, որ հանրության առջև հաշվետու լինելու բոլոր մեխանիզմները փակվում են:
 
Անդրադառնալով դռնփակ նիստ անցկացնելու այն հիմնավորմանը, թե կառավարության անդամները քննարկումների ժամանակ կաշկանդվում են, Դոյդոյանն ընդգծեց. «Այո, այդպես էլ պետք է լինի: Լրագրողների դերը հենց պաշտոնյաներին կաշկանդելն է, լրագրողների ներկայությունը ստիպում է հանրության շահերից բխող որոշումներ կայացնել, ոչ թե առաջնորդվել անձնական շահերով ու կարիքներով»:

Ինֆորմացիայի ազատության կենտրոնի ղեկավարը պնդեց, որ առաջիկա մեկ տարվա ընթացքում հաջորդելու են մնացած մյուս մարմինների նիստերը փակելու նախաձեռնությունները:

«Սա միայն առաջին քայլն է, ոչ թե միակը: Փակելու են քաղաքապետարանի նիստերը, դատական նիստերը»,-ասաց նա:

Քննարկման մասնակից Խոսքի ազատության պաշտպանության կոմիտեի նախագահ Աշոտ Մելիքյանը նախ նկատեց, որ կառավարության նիստերի դահլիճում լրագրողները ներկա չեն, նրանք նիստի աշխատանքներին հետևում են մոնիտորի միջոցով:

«Այսինքն այստեղ կաշկանդվելու հարց չկա: Եթե նույնսիկ այս դեպքում նրանք կաշկանդվում են, ապա դա նրանց խնդիրն է, ուրեմն պատրաստ չեն հանրային դեմք լինել: Ես այստեղ նաև կոռուպցիոն, հասարակությունից շատ հարցեր թաքուն բաներ պահելու ռիսկեր եմ տեսնում»,-ասաց նա:

Մելիքյանի խոսքով, փակ աշխատելը, դռները փակելը տոտալիտար համակարգին բնորոշ հատկանիշներ են: «Սա քաղաքական վերնախավի որոշում է, և այնպիսի հստակ որոշում, որ նրանք քննարկումների պատրաստ չեն»,-կարծիք հայտնեց նա:

Երևանի Մամուլի ակումբի նախագահ Բորիս Նավասարդյանի կարծիքով, դռնփակ նիստերի որոշումը պատահական քայլ չէ: «Ես կարծում եմ՝ պայմանավորված է այն հանգամանքով, որ առաջիկա ամիսներին ընդունվելու են ոչ պոպուլյար, համարձակություն կունենամ ասել հանրային շահերին հակասող որոշումներ: Դրանց ընդունման ընթացքում նախարարներն ու այլ պաշտոնյաներ ներկայացնելու են այնպիսի տեսակետներ, որոնք իրենց վարկաբեկելու են»,-ասաց նա: