Ձեր վստահելի աղբյուրը

Ռեյտինգային ընտրակարգի վերաբերյալ Հայաստանի Հանրապետական կուսակցության հետ տարաձայնությունները գոյություն ունեին նաև մինչև կոալիցիայի կազմումը: Փետրվարի 12-ին ԱԺ ճեպազրույցների ժամին այս մասին հայտարարեց ՀՅԴ խմբակցության ղեկավար Արմեն Ռուստամյանը:

«Մենք ասել ենք՝ կարող է լինել վիճակ, որ ավելի շատ ձայն ստացողը չստանա մանդատ, քիչ ստացողը՝ ստանա, հենց այդպես էլ եղավ: Այս խնդիրը գոյություն ուներ մինչև կոալիցիայի ձևավորումը, մենք այդ հարցը օրակարգից չենք հանել, գիտեինք, որ ՀՀԿ-ն դեմ էր, այդ պատճառով հարցը չլուծվեց նախնական փուլում, սակայն մենք շարունակելու ենք այդ ուղղությամբ մեր մոտեցումները պաշտպանել, որովհետև համարում ենք, որ վաղ թե ուշ այդ խնդիրը պետք է լուծվի»,- ասաց նա:

Ռուստամյանի խոսքով՝ եթե անգամ չեն համաձայնում իրենց մոտեցումներին՝ թե որ ուղղությամբ պիտի փոխվի ընտրական օրենսգիրքը, ապա երկար չեն կարող այս հարցը շրջանցել: Նա ընդգծեց՝ Սահմանադրությունը պահանջում է, որ մեր ընտրությունները լինեն համամասնական ընտրակարգով, ուրեմն դրան ադեկվատ լուծումներ պետք է գտնել: ՀՅԴ խմբակցության ղեկավարը նշեց՝ խորհրդարանական համակարգի անցման ժամանակ իրենք իբրև գլխավոր խնդիր նշում էին Հայաստանում գերկենտրոնացված, միահեծան իշխանության վերացումը:

«Այս համակարգի անցումը բոլորի գնահատականներով իսկապես ավելի ժողովրդավարական է, այն է՝ անցում է կատարվել ապակենտրոնացված համակարգի, այստեղ խնդիրը շատ ակնհայտ է, որ պետք է այդ ապակենտրոնացումը լիարժեք իրականացնել: Այդ ապակենտրոնացումը ելակետային, սկզբնական փուլում անպայման տեղի է ունենալու, որը բերելու է նրան, որ իշխանության ճյուղերը տարանջատվելու են»,- ասաց նա:

Ըստ Ռուստամյանի՝ գլխավոր հարցը, որ այս Սահմանադրությամբ լուծվել է, այն է, որ երաշխիքներ են տրվել մասնավորապես դատական իշխանության անկախության առումով: Նա կարևորեց նաև այն, որ առաջին անգամ արձանագրված է՝ նախարարներն էլ իրենց քաղաքականությունն ինքնուրույն որոշելու իրավասություն ունեն: ՀՅԴ խմբակցության ղեկավարի խոսքով՝ սա ևս պետք է ամրագրվի՝ ըստ Սահմանադրության. առաջին անգամը լինելով՝ նախարարներին կարելի է անվստահություն հայտնել:

«Հայաստանում դժբախտաբար կա իներցիոն մտածելակերպ: Համակարգը փոխվել է, դրա նրբություններին հասարակության լայն շրջանակները ծանոթ չեն, բայց իրենց թվում է՝ ոչ մի բան էլ չի փոխվել, կարծում են՝ համակարգային փոփոխությունների քողի տակ պահպանվել է նույն կառավարման ոճը, տնտեսական կարգը, սոցիալական քաղաքականությունը, այս տպավորությունը գոյություն ունի, բայց կարծում եմ՝ այն պետք է ցրել»,- ասաց նա:

Դրա համար, ըստ Ռուստամյանի, գործընթացների արագ իրականացում է պետք: Նա կարևորեց սոցիալական քաղաքականության փոփոխությունը, քանի որ չի կարող Հայաստանում լինել մի անձ, որը չունենա նվազագույն եկամուտ՝ իր գոյությունը պահպանելու համար, մինչդեռ ներկայում ոչ թե մեկ այդպիսի անձ կա, այլև բազմաթիվ, նման ընտանիքներ կան:

Լրագրողները խնդրեցին արձագանքել ՀՀԿ հայտարարությանը, թե չեն պատրաստվում հրաժարվել ռեյտինգային ընտրակարգից: Ռուստամյանը նշեց, որ ձեռնպահ կմնա որևէ մեկնաբանությունից: «Ես չեմ ուզում քննարկումներից առաջ հայտարարություններ անել, սա նուրբ հարց է: Մենք ունենք մեծ փորձ, երբ բանակցությունների փուլում սեպարատ հայտարարություններ են արվում, դա ավելի շատ օգտագործվում է ի վնաս բանակցություններում արդյունք ստանալու նպատակներին, ձեռնպահ եմ մնում վերլուծություններ անելուց, թե ինչու է այդ համակարգը պաշտպանում ՀՀԿ-ն, ժամանակի ընթացքում ավելի բացահայտ կխոսենք պատճառների ու անելիքների մասին»,- ասաց նա: