Ձեր վստահելի աղբյուրը

«Աշխարհի լավագույն սննդակարգ ու խոհանոց ունեցող Հայաստանն այսօր աշխարհի վատագույն սննդակարգ ունեցող երկրներից մեկն է»,- այսօր լրագրողների հետ հանդիպմանն այսպիսի մտահոգություն հայտնեց ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար, պարենային իրավունքի փորձագետ Դավիթ Պիպոյանը:

Մասնագետի խոսքով՝ մեր երկիրն իր ավանդական խոհանոցում ունի այնպիսի բաղադրիչներ՝ հատիկեղեն, լոբազգիներ, մածուն, կարմիր գինի, որոնք ի տարբերություն արագ սննդի մեջ օգատագործվողների՝ չեն նպաստում օրգանիզմի արագ ծերացմանն ու առողջարար են։

Անդրադառնալով կիսաֆաբրիկատներին ու դրանց տարածմանը, սննդագետն ասաց. «Ամբողջ աշխարահում օգտագործվող կիսաֆաբրիկատները ինչու՞ են ստանում «ֆասթ ֆուդ» անվանումը, որովհետև այն արագ է պատրաստվում և չի պահանջում շեֆ-խոհարար։ Նույն մարդը հիմնականում և սեղան է մաքրում, և սպասարկում է, և պատրաստում, դրա համար հատուկ կրթություն չի պահանջվում, քանի որ նրանք արդեն պատրաստի ստանում են այդ կիսաֆաբրիկատները և աննշան պրոցեսներ իրականացնելով՝ կարողանում են այդ սնունդը սպասարկել։ 

Արագ սննդի կետերում օգագործվող սննդամթերքն ունի երկար պիտանելիության ժամկետ, իսկ երկար պիտանելիության ժամկետ ունենալու համար, բնականաբար, պարունակում են մեծ քանակության սննդային հավելումներ, որոնք ևս օրգանիզմի համարվնասակար ազդեցություն ունեն»։

Մասնագետը մանրամասնեց, որ պետք է ուշադիր լինել նման վայրեից ձեռք բերվող սննդին և հիշել՝ այն ամենն ինչ-որ ձեռք է բերվում նմանատիպ վայրերից՝ «իրականում այն չէ, ինչ որ դուք մտածում ենք»։

«Օրինակ՝ բոլորին այդքան հայտնի հավի նագեթսները, ինչը թվում է, թե պատրաստված է հավի կրծքամսից: Բայց եթե փորձենք տնային պայմաններում պատրաստել, երբեք այնպիսին չի լինի, ինչ-որ արագ սննդի կետերում է։ Իրականում մի շարք հետազոտությունների արդյունքում պարզվել է, որ այնտեղ հավի միսը կազմում է 50-60 տոկոս, քանի որ դրանց մեջ օգտագործվում են տարբեր ենթամթերքներ, մասնավորապես՝ հավի կաշի, մսոսկրային ալյուր, որոնք տարբեր նյութերով պատվում են»,- ասաց Պիպոյանը։

Նա շեշտեց, որ «ֆասթ ֆուդ» օգտագործելու դեպքում գերադասելի է քաբաբը, իսկ թե ինչու՞, մասնագետն այսպես բացատրեց. «Քաբաբն էլ է «ֆասթ ֆուդի» տեսակ, բայց ի տարբերություն մյուսներին, սրան ավելացվող բաղադրիչներն ավելի անվնաս են, քան բարձր ջերմամշակում անցնող կիսաֆաբրիկատները։ Հիմնականում ավելացվում են քիչ քանակությամբ ճարպեր, լոլիկ կամ կաղամբ, փաթաթվում է լավաշով, իսկ սրանք  առողջության համար դրական ազդեցություն ունեն»։

Ամփոփելով խոսքը, բանախոսը ևս մեկ անգամ ուշադրություն հրավիրեց սննդի ոլորտում պետական հոգածության բացակայության վրա։

«Ապրանքի գինը որքան թանկանում է, այնքան կեղծումների ռիսկն ավելանալու է։ Օրինակ՝ կարագի թանկացման դեպքում տնտեսվարողներն  փորձելու են բուսայուղ, տրանսճարպեր, սփրեդներ, մարգարիններ խառնել մթերքին։ Սա խիստ վերահսկողության կարիք ունի։ Իտալիայում ապրանք կեղծելու համար մարդուն կարող են ցմահ ազատազրկել, իսկ այստեղ ոլորտը բարձիթողի վիճակում է»։

Ավելացնենք, որ նույնիսկ «թանկից էժանը չկա» ընտրությունն է սխալ լինելու, որովհետև ՈՉ ՈՔ չի երաշխավորում նույնիսկ թանկ մթերքների որակը: Ոչ թանկի, ոչ՝ էժանի: